नेवाः देय् दबूया १७ क्वःगु बुदिं

येँ (झीगु स्वनिगः)

म्हिगः नेवाःतय्गु राष्ट्रिय संगठन नेवाः देय् दबूया झिंन्हय्क्वःगु बुदिं थनया परोपकार आदर्श माध्यमिक विद्यालयया हलय् छगू ज्याझ्वः दथुइ जूगु दु । नेवाः देय् दबूयया नायः नरेश ताम्रकारया सभापतित्वय् जूगु उगु ज्याझ्वलय् नेवाः राष्ट्रिय धुन हायेका न्ह्याकूगु खः । दबूया न्वकु धर्मशोभा तुलाधरं लसकुस न्वचू बियादीइगु उगु ज्याझ्वलय् नेवाः जुयाः नं थीथी ख्यलय् ज्वःमदुगु योगदान यानादीपिं महाविद्यावाधी पदं विभूषित नेपालभाषा एकेदमिया चान्सलर नापं संस्कृतिविद् सत्यमोहन जोशी, त्रिभुवन विश्व विद्यालयया उपकुलपतिइ नियुक्ति जुयादीम्ह प्रा. डा. हिराबहादुर महर्जन, डा. त्रिरत्न मानन्धर व प्रा. डा महेश्वरमान श्रेष्ठ, सगरमाथा सफल आरोहण याःपिं स्वम्ह सन्त कुमार महर्जन, ज्ञानेन्द् कुमार श्रेठ व सुवि श्रेष्ठयात भिंतुना पौ लःल्हायेगु ज्या जूगु खः ।

महेश्वरमान श्रेष्ठ धाःसा उपस्थिति जुयामदीगु खः । वय्कःपिन्त बेतलिं चिकाः, खेँ सगं बियाः भिंतुना पौ देछायेगु ज्या जूगु खः । ज्याझ्वलय् देय् दबूया स्मारिका लुमन्ति पौ नं बिमोचन याःगु खः ।
पाहांपिं पद्मरत्न तुलाधर, मोहन कृष्ण डंगोल, लक्ष्मण राजवंशी, बुद्ध साय्मि, राजेन्द्र श्रेष्ठ, मल्ल के सुन्दर, डा. सुमित्रा मानन्धर गुरुङ, डा. मंगलसिसिद्ध मानन्धरलगायतया उपस्थिति जूगु खः ।
डा. सुमित्रा मानन्धर गुरुङं थः मां बौया नामं नेपालभाषा ख्यःया नितिं छगू लाखया कोष दयेकाः बिइगु जुइ धकाः घोषणा यानादीगु खः । ज्याझ्वलय् सत्यमोहन जोशी, डा. हिराबहादुर महर्जन, लक्ष्मण राजवंशी, मल्ल के सुन्दर, सुमित्रा मानन्धर गुरुङपिन्सं न्वंवादीगु खः ।

सगरमाथा आरोही ज्ञानेन्द्र श्रेष्ठं च्वापुगुँ गयागु इलय् यानादीगु अनुभव कनादीगु खः । देय् दबूया बुदिं स्वनिगःया थीथी जिल्लाय् नं जिल्ला समन्वय समितिपाखें हंगु दु ।नेवाः देय् दबूपाखें बियादीगु जानकारी कथं सुनसरी, धरान, इलाम, मोरङ, झापा, धनकुटा, कन्चनपुर लगायतया जिल्लाय् नं देय् दबूया झिंन्हय्क्वःगु बुदिं थीथी ज्याझ्वः यानाः हनेज्या याःगु दु । उगु समारोह याये न्ह्यः सांस्कृतिक ब्वज्या नं याःगु खः ।