येँय् पार्कि· समस्या

येँय् मोटर मोटरसाइकल आवश्यकता स्वयाः नं अप्वः दुगु कारणं पाकिङ्ग समस्यां तःधंगु दुःख वियाच्वंगु दु । स्वनिगःया लँ सतक पुलां व चिव्यागु कारणं थ्वहे अप्वः मोटर मोटर साइकल तकं अःपुक्क व याउँक वने वये दयाच्वंगु मदु । गनं गनं एक तफिर् जक वये वने दैगु लँ यानाः ट्राफिक व्यवस्था याःसां इलय् व्यलय् जाम जुयाः घन्टौं पीमालीगु समस्या नं मोटर मोटर साइकल थुवाःतय्सं भोगय् याना वयाच्वंगु समस्या खः । व्यस्त सतकया थाय् थासय् पाकिङ्गया व्यवस्था यानातःगु दु । विशाल वजारया पश्चिमय् मोटरसाइकलया पाकिङ्ग, पुतलिसतक, मोडल अस्पताल, दरवार मार्ग, रवि भवन, स्वयम्भू खिचापुखू, धरहरा लगायत क्षेत्रय् येँ महानगरपालिकां हे पाकिङ्गया व्यवस्था छगूला मूल सतकय् हे पाकिङ्गया व्यवस्था यानाः सतक आवागमनय् पंगः जुयाच्वंगु दु, मेख्य मोटरसाइकल मोटर तयेगु लिकायेगु प्रकृयाय् नाप यक्को सामान्य दुर्घटनानापं जुयाच्वंगु दु । लँय् जुइपिन्त पंगः थनीगु ला दहे दु । वंगलय् ट्याक्सीया पाकिङ्ग पाय्छि मजू धायेत स्वंगः प्यगः धाःसा न्हय्गः च्यागः ट्याक्सी पाकिङ्ग याइगु जुयाच्वंगु दु । उकीसनं अतिकं व्यस्तगु उगु चोकय् अप्वः मोटर ट्याक्सीं दिशा परिवर्तन यायेगु थाय् कथं नं उगु चोकयात छ्यलाव्याच्वंगु दु । उकीसनं रिक्सा पार्क नं थनहे तयातःगु दु । थुकिं यानाः उगु वंगलं जुइपिं अप्वः मनूतय्त मछिनाच्वंगु दु । उकिं वंगलं उगु छुंनं पाकिङ्ग याये मजिल व रिक्सा, ट्याक्सी मेथाय्हे पाकिङ्गया व्यवस्था यायेगु जरुरी दु ।

येँया पाकिङ्ग समस्या चीकेत येँ महानगरपालिकां आःदँ २०६८/०६९ सं पाकिङ्ग क्षेत्र विस्तार यायेगु धाःगु दु । येँ घोषणा २०६८ कथं नं येँ आवंनिसें वहुतलीय भवन दयेकाः पाकिङ्ग समस्या चीकेगु विकल्पया व्यवस्था यायेगु कथं न्ह्यःने वःगु दु । थाय्या कारणं आः हरेक छेँ दनेवलय् अण्डर ग्राउण्डय् पाकिङ्ग व्यवस्था चीकेगु ग्वसाः वयाच्वंगु दु । अथ्यहे महानगरपालिकाया धर्मपथय् नं थुज्वःगुहे वहुतलीय भवन दयेकेगु ग्वसाः ग्वयाच्वंगु दु । महानगरपालिकां अप्वंसिवे वहुतलीय भवन दयेकेगु स्वीकृति वी न्ह्यः पार्किङ्गया व्यवस्था दु मदु स्वइगु जूगु दु । विना पाकिङ्गया व्यवस्थाया भवन दयेकेगु स्वीकृति तकं मवीगु जूगु दु । थौं कन्हय् न्हिं झिगः सवारी साधन गलत पाकिङ्ग याःगु द्वपनय् ज्वनेगु यानाच्वंगु दु । तर पाकिङ्ग स्थलया व्यवस्था विना समस्या ज्यनीगु खनेमदु । छगू लाख गाडीया पाकिङ्गया क्षमता दुसा थौंकन्हय् ६ लाख गाडीतय्गु पाकिङ्गया समस्या दु । थौं कन्हय् येँया ६० थासय् पाकिङ्गया व्यवस्था यानातःसां थ्व पर्याप्त मजू ।

थीथी व्यापारिक भवनय् पाकिङ्गया सुविधा नं दु, गथ्यकि काठमाडौं मलय् मोटर साइकल १००० व मोटर सत्या, वल्र्ड ट्रेड सेन्टरय् ५०० मोटरसाइकल व २०० मोटर, सिभिल मलय् ३०० मोटर साइकल २५० मोटर, सिटी सेन्टरय् ३०० मोटर साइकल, सत्या मोटर, आरवी कम्प्लेक्स १५० मोटर साइकल मोटर २५ पाकिङ्गया व्यवस्था दु । येँ महानगरपालिकां विश्व वैंकया ग्वाहालिं तिनिख्यलय् अण्डर ग्राउण्ड पाकिङ्ग स्थल दयेकेगु निति सम्भावना अध्ययन यायेधुंकूगु दु । थ्व पाकिङ्ग गवले दयेकाः गुलि दँ लिपा सिधइगु खः धायेफूगु अवस्था मदु । तर गवले तक्क थ्व पाकिङ्ग दयेकाः क्वचाइ मखु अवले तक्क पाकिङ्ग समस्याया समाधान सम्भव मदु ।

More Stories Like this