विवाद ज्यंकेत माओवादी केन्द्रीय समितिया मुँज्या असोज १ गते
येँ (झीगु स्वनिगः)
संविधानसभाया दक्ले तःधंगु दल एकीकृत नेकपा -माओवादी)या केन्द्रीय समितिया मुँज्या थ्व हे वइगु असोज १ गते च्वनीगु जूगु दु । म्हिगः आइतवाः पार्टीया केन्द्रीय ज्याकू कोटेश्वरया पेरिसडाँडाय् एकीकृत माओवादीया स्थायी समितिया मुँज्या च्वनाः उगु कथं असोज १ गते स्थायी समितिया मुँज्या च्वनेगु धकाः खँ क्वःछ्यूगु खः । पार्टीया नायः पुष्पकमल दाहाल प्रचण्डया नायःसुइ च्वंगु उगु मुँज्यां सेना समायोजन नाप स्वापू दुगु विषयस ब्वलंगु विवाद समाधान यायेगु नितिं केन्द्रीय समितिया मुँज्या थ्व हे असोज १ गते च्वनेगु धकाः निर्णय जूगु दु धकाः पार्टीया प्रवक्ता दिनानाथ शर्मां जारी यानादीगु बिज्ञप्तिइ न्ह्यथनातःगु दु ।
भदौ १८ गतेया मिति तयाः पिथंगु उगु विज्ञप्तिइ फुक्क ज्ञात अज्ञात सहिदतय्गु लुमन्तिइ व सम्मानय् मौन धारण यानाः मुँज्या न्ह्याःगु नापं केन्द्रीय समितिया मुँज्या मजूतले विवादास्पद ज्याझ्वः सार्वजनिक रुपं सुनां नं मयायेगु धकाः नं निर्णय याःगु खँ न्ह्यथनातःगु दु । अथे म्हिगः स्थायी समितिया मुँज्या च्वने न्ह्यः पार्टीया केन्द्रीय पदाधिकारीया मुँज्या च्वंगु खः । अथे हे शनिवाः नं माओवादीया स्थायी समितिया मुँज्या च्वंगु खः ।
