धादिङय् दुर्घटना जुयाः प्यम्ह मन्त
येँ (झीगु स्वनिगः)
म्हिगः आइतवाः सनिलय् आकाझाकां धादिङया कल्लेरी गाविस वडा नं. १ या सामकुवा लागाय् ग्रामीण सडक लागाय् मिनिट्रक फातापुलाः घटनास्थलय् हे प्यम्ह मनूत सीगु दु । उगु दुर्घटना कल्लेरीं लिक्क च्वंगु उगु हे जिल्लाया खल्टे गाविसपाखे वनाच्वंगु ना १ ग ३३८ नम्बरया मिनिट्रक आकाझाकां अनियन्त्रित जुयाः सतकं १ सय मिटर क्वय् कुतुंवनाः दुर्घटना जूगु खः । दुर्घटनाय् लानाः स्वम्ह मिसापिं नापं छम्ह मिजं सीगु खः । सनिलया साढे ४ बजे उगु कथंया दुर्घटना जूगु खः । दुर्घटनाय् लानाः मेपिं झिंप्यम्ह नं घाःपाः जूगु दु । घाःपाः जूपिन्त वासः यायेगु नितिं येँय् हःगु दु ।
उगु दुर्घटनायात कयाः म्हिगः आइतवाः बहनी तक नं प्रहरीं अनुसन्धान यानाच्वंगु दु । घटनाया बारे पूवंक जानकारी ब्यूगु मदुनि । अथे दुर्घटनाय् लानाः सीपिनिगु सनाखत तकं याये मफयाच्वंगु खः ।
