१३ म्ह मन्त्रीतपाखें सपथ भण्डारी नापं प्यम्ह अनुपस्थिति

येँ (झीगु स्वनिगः)

एकीकृत माओवादी व संयुक्त लोकतान्त्रिक मेधसी मोर्चाया १३ म्ह मन्त्रीतय्सं म्हिगः आइतवाः बहनी सपथ कयादीगु दु । माओवादीया खुम्ह अले मोर्चाया न्हय्म्ह मन्त्रीतय्सं प्रधानमन्त्री डा. बाबुराम भट्टराईपाखें सपथ कयादीगु खः । राष्ट्रपति डा. रामवरण यादवया निवासय् अथे सपथ नकेगु ज्या जूगु खः । प्रधानमन्त्री भट्टराई नं माओवादीया न्वकु नारायणकाजी श्रेष्ठ प्रकाशयात उपप्रधान नापं परराष्ट्रमन्त्रीया सपथ नकादीगु खः । माओवादीया बरिष्ठ न्वकु मोहन बैद्य किरणपक्षं धाःसा कन्टेनरया ताःचा लःल्हाःगु प्रकरण समाधान मजूतले सरकारय् वनेगु जुइमखु धकाः अडान काःगु दु । अथे हे म्हिगः माओवादीपाखें उर्जा मन्त्रीइ पोष्टबहादुर बोगटी, स्थानीय विकास मन्त्रीइ टोपबहादुर रायमाझी, अर्थमन्त्रीइ बर्षमान पुन अनन्त, भूमिसुधार मन्त्रीइ प्रभु शाह व युवा तथा खेलकुद मन्त्रीइ कमला रोकाय नं सपथ नयादीगु खः ।

उगु हे कथं मधेसी मोर्चापाखें सूचना तथा संचार मन्त्रीइ जयप्रकाश प्रसाद गुप्ता, भौतिक योजना तथा निर्माण मन्त्रीइ हृदेश त्रिपाठी, सिँचाइ मन्त्रीइ महेन्द्र राय यादव, वन मन्त्रीइ मोहमद वकील मुसलमान, कृषि मन्त्रीइ नन्दन कुमार दत्त, स्वास्थ्य मन्त्रीइ राजेन्द्र महोत्तो व विना विभागीय मन्त्रीइ राजनलाल यादवं सपथ नयादीगु खः । फोरम लोकतान्त्रिकपाखें रक्षा मन्त्री सिफारिस जूम्ह शरतसिंह भण्डारी व वातावरण मन्त्रीया नितिं सिफारिस जूम्ह निलम बर्मां धाःसा सपथ नयामदी । अथे हे कानुन मन्त्रीया नितिं सिफारिस जूम्ह तराई मधेस लोकतान्त्रिक पार्टीया जितेन्द्र सोनल व महिला बालबालिका मन्त्रीइ सिफारिस जुयादीम्ह तमलोपा नेपालया दानबहादुर चौधरीं नं सपथ नयामदी । भदौ ११ गते मधेसी मोर्चाया समर्थनय् प्रधानन्त्रीइ डा. भट्टराई निर्वाचित जुयादी धुनेवं अबले मोर्चापाखें विजयकुमार गच्छेदारं उपप्रधान नापं गृहमन्त्रीया सपथ नयादीगु खः । आः मन्त्री मण्डल १५ म्हेसिया जूगु दु ।