'नेवाः भावना दुपिं नेवाःत झन् झन् म्हो जुयावन'

संस्कृतिविद् डा. सत्यमोहन जोशीं नेवाः भावना दुपिं नेवाःत झन् झन् म्हो जुयावनाच्वंगु धयादिसें थज्याःगु हे अवस्था जुयाच्वन धाःसा नीन्यादँ लिपा झी हे पुस्तां नेवाः जातियात थुनाछ्वइगु खँ धयादीगु दु ।

'न्हापा स्वनिगः दुने खुइगु प्रतिशत दुपिं नेवाःत आः म्हो जुयाः स्वीन्यागू निसें पीगू प्रतिशतय् थ्यनेधुंकल, उकि मध्ये नं स्वीन्यागू प्रतिशत नेवाःतय्सं थःगु भाय् त्वतेधुंकल' जोशीं धयादिल, 'थज्याःगु हे अवस्था खःसा नीन्यादँया दुने झी हे पुस्तां नेवाः जातियात थुनाछ्वइ ।'

नेवाः देय् दबूया झिंन्हय्क्वःगु बुन्हिया लसताय् येँया परोपकार स्कूलय् जूगु ज्याझ्वलय् संस्कृतिविद् जोशीं नेवाःतय्त आः थीथी विधाय् मखसें नेपालभाषा ख्यलय् सालाकायेमाःगु बिचाः प्वंकादिल ।

देय् दबूया नायः नरेश ताम्राकारया सभापतित्वय् जूगु ज्याझ्वलय् देय् दबूया संरक्षक लक्षमण राजवंशीं देय् दबू नकतिनि झिंन्हय्दँय् क्यंगु खःसां थ्व तसकं ग्यानापुगु ई जूगुलिं होस यानाः न्ह्याः वनेमाःगु बिचाः प्वंकादिल । अथेहे मेम्ह संरक्षक मल्ल के. सुन्दरं थीथी ख्यःया बुद्धिजीवि व नाःजांपिं नेवाःत सुविधाया निंतिं थः नेवाः धायेगु यानाच्वंगु तर थः नेवाः धकाः गौरव यानाः समाजय् वयेमछाःगु धयादिल ।

ज्याझ्वलय् काठमाडौँ विश्वविद्यालयपाखें महाविद्यावारिधिया उपाधिपाखें विभुषित जुयादीम्ह सत्यमोहन जोशी, त्रिभुवन विश्वविद्यालयया उपकुलपति प्रा. डा. हिराबहादुर महर्जन लुम्बिनि विश्वविद्यालयया उपकुलपति डा. त्रिरत्न मानन्धर नापं सगरमाथाया च्वकाये तक सफलतापूर्वक आरोहण याःपिं सन्तकुमार महर्जन, सुविर श्रेष्ठ व ज्ञानेन्द्र कुमार श्रेष्ठयात देय् दबूपाखें हंगु खः ।

हनाः ज्याझ्वः धुंकाः त्रिविया उपकुलपति महर्जनं नेवाःतय्सं थःत याःगु सम्मानपाखें थः उत्साहि जुयाः नेवाःतय् निंतिं अझ अप्व यायेमाः धइगु भावना ब्वलंगु धयादिल । अथेहे मेम्ह उपकुलपति मानन्धरं लुम्बिनि विश्वविद्यालयय् बौद्ध शिक्षा नापं नेवाः रिति रिवाज व नेपालभाषा ब्वनेगु व्यवस्था जुइत्यंगु जानकारी बियादिल ।

देय् दबूया नायः ताम्रकारं सुभाय् देछानादीगु ज्याझ्वलया देय् दबूया लुमन्तिपौ नं उलेज्या याःगु खः । ज्याझ्वलय् देय् दबूया सल्हाकार सुमित्रा मानन्धरं मेगू दँ निसें जुइगु देय् दबूया बुन्हि हनाः ज्याझ्वलय् थः मांअबुया नांम छगू-छगू लख दुगु निगू सिरपा बिइगु घोषणा नं यानादिल । वय्कलं सिरपाया नां आः तक मछुयानीगु जूसां छगू मानवअधिकारया ख्यालय् ज्या यानाच्वंपिं नेवाःत व मेगू नेवाः कला संस्कृतियात प्रवद्धन यानाच्वपिंत देँय् दसं उगु सिरपा लःल्हायेगु धयादिल ।

More Stories Like this