'नयाँ पत्रिका'य् डन आक्रमण
पत्रिकाया ज्याकुथी व्यापक तोडफोड
येँ (सन्ध्या टाइम्स)/पत्रिकाय् पिहां वःगु समाचारयात हे कयाः हानं मेगु छगू पत्रिकाया ज्याकुथी तोडफोड जूगु दु। नांजाःगु न्हिपौ 'नयाँ पत्रिका'या कमलपोखरीस्थित ज्याकुथी थौं सुथय् गुम्ह मनूत वयाः तोडफोड याःगु खः।
उगु न्हिपौया थौंया हे ल्याखय् पिहां वःगु 'तरवारसहित तीन पक्राउ' धाःगु समाचारयात कयाः उमिसं पत्रिकाया ज्याकुथी तोडफोड याःगु खँ धाःगु दु ।
प्यंगः मोटरसाइकल गया वःपिं गुम्ह मनूतय्सं पत्रिकाया ज्याकुथी तोडफोड याःगु खः। उमिसं अन च्वंगु कम्प्युटर, मेच, टेबुल, फोन, झ्याः व लुखा समेत स्यंका थकूगु खः।
पत्रिकाया सम्पादक प्रकाश ज्वाला देवकोटां 'सन्ध्या टाइम्स' यात कनादी कथं आक्रमण याः वःपिं फुक्कं नेवि संघया कार्यकर्ता खः। तर नेवि संघया कार्यकर्ता खःसां उपिं पिने पिने धाःसा गुडागर्दी याना जुइपिं मनूत खः धकाः नं सम्पादक देवकोटां कनादिल ।
दुने घाराघुरु याःबलय् उमिसं अन हे दिकातःगु टी बेटुल ल्ह्वनाः लेखाय् ज्या याइम्ह छम्ह कर्मचारीयात कयेकूगु ख वन सा उकी लानाः कम्प्युटर स्यंगु खँ नं सम्पादक देवकोटां कनादिल। उपिं वःबलय् देवकोटा धाःसा ज्याकुथी मथ्यंनिगु जुयाच्वन ।
उमिसं अज्याःगु समाचार हानं च्वत धाःसा थःपिं हाकनं वयाः अझ तःधंगु कारवाही याये माली धकाः ख्याच्वः बिया थकूगु खँ नं धाःगु दु। आक्रमण याः वःपिं मनूत राजधानीइ सक्रिय जुयाच्वंपिं 'लोकल डन' जुइमाः धकाः नं अनुमान याःगु दु ।
घटनायात कयाः प्रहरीयात जानकारी बीधुंकूगु दुसा प्रहरीं आः अपराधीतय्त मालेगु ज्या नं यानाच्वंगु दु। प्रहरीं घटनास्थलय् वनाः क्षतिया मुचुल्का कायेधुंकूगु दु।
'नयाँ पत्रिका' न्हिपौपाखें वंगु छुं ई न्ह्यवंनिसें राजधानीया डनतय्गु बारे नियमित रुपं समाचार च्वयेगु याना वयाच्वंगु खः ।
