बैद्य पक्षं प्रचण्डया भण्डाफोर याइगु
येँ (सन्ध्या टाइम्स)/एकीकृत माओवादीया अध्यक्ष प्रचण्ड विरुद्ध माओवादीया वरिष्ठ न्वकु मोहन बैद्य किरणं आः भण्डाफोर अभियान न्ह्याकीगु जूगु दु। देय्न्यंकं जनजागरण अभियान धासें पार्टी दुने जुयाच्वंगु गलत प्रबृति व आर्थिक अनियमितताया खँ समेत सार्वजनिक यायेगु ल्याखं उगु भण्डाफोर अभियान न्ह्याकेत्यंगु खः ।
थुकिया नितिं स्वनिगलय् गुज्वःगु ज्याझ्वः याये माली धकाः सहलह ब्याकेत बैद्य पक्षधर नेवाः राज्य समितिया दुजःपिनि बैठक थौं हे च्वनाः ज्याझ्वः क्वःछीगु खँ छम्ह नेतां धयादीगु दु। विशेष यानाः कोणसभा, वाल पेन्टिंग, पर्चा इनेगु ज्याझ्वःत बैद्य पक्षं याइ धाःगु दु। कन्टेनरया ताःचा लःल्हायेगु विषययात कयाः माओवादी दुने विवाद तच्वया वयाच्वंगु खःसा उगु हे विषययात कार्यकर्ता नापं जनतायात थुइके बीगु निंतिं थ्व अभियान न्ह्याकेत्यंगु खः। माओवादी स्थायी समितिया बैठकं कन्टेनरया ताःचा सेना समायोजन विशेष समितियात लःल्हायेगु निर्णय याःगु दु वा मदु धैगु विषययात कयाः हे पार्टी दुने ल्वापु तच्वयावःगु खः। वास्तवय् स्थायी समितिया बैठकं पारित याःगु प्रस्तावय् सेनाया मोडालिटी, तह, संख्या लगायतया खँ दुथ्याकाः नापं माओवादी नेतृत्वय् सरकार गठन जुइवं लडाकु, हतियार व कन्टेनर मूर्त रुपं लःल्हायेगु धकाः माओवादी सेनाया लडाकु व पुनस्थापना बारे धाःगु शीर्षकया ञ नम्बरय् च्वयातःगु दु। उगु प्रस्तावया क निसें ञ तकया बुँदाय् राष्ट्रिय सुरक्षा नीति दयेकेगुनिसें सेना समायोजनया खँ तक दुथ्याः ।
थौंकन्हय् अध्यक्ष प्रचण्ड पक्षधरं मेमेगु बुँदायात त्वःताः व हे ञ नम्बरया बुँदायात जक न्ह्यःने तयाः ताःचा लःल्हायेगु ज्या पार्टीया निर्णय कथं हे जूगु खः धकाः दावी यानाच्वंगु दुसा बैद्य पक्षं धाःसा व फुक्कं प्याकेजया खँ खः धासें ताःचा जक लःल्हायेगु धइगु आत्मसमर्पणवादी ज्या खः धकाः उकिया विरोध याना वयाच्वंगु खः ।
