जकःमिया ज्यापु-स्वां
जनकवि दुर्गालाल श्रेष्ठं थःगु मृत्यु लिपा थम्हं यायेगु ज्या राजभाई जकःमिं यानादी धयादिल।
कवि राजभाई जकःमिं च्वयादीगु 'ज्यापुस्वां' व 'झीगु राष्ट्रिय मे' नांगु सफू व सीडी म्हिगः छगू ज्याझ्वःया दथुइ विमोचन जुल। उगु सफू व सीडी पुलांम्ह मन्त्री हिसिला यमि, जनकवि दुर्गालाल श्रेष्ठ, नेवाः देय् दबूया संरक्षक मल्ल के. सुन्दर, ज्यापु महागुथि येँ नगर समितिया नायः ई. मोहनकृष्ण डंगोल व परम्परागत ६३ त्वाःया नायःगुरुपिंसं मंकाः कथं विमोचन यानादीगु खः ।
उगु हे ज्याझ्वलय् कवि जकःमियात ज्यापु महागुथिपाखें भुलाय्गां न्ययेकाः हनेज्या नं याःगु खः। ज्याझ्वःया उलेज्या यासें मूपाहां हिसिला यमिं दक्व जनजाति मध्ये नेवाःत दकलय् शिक्षित जूगुलिं नेवाःतय्सं शहरी अवधारणा बी फयेकेमाः धयादिल। जनकवि दुर्गालाल श्रेष्ठं थःगु मृत्यु लिपा थम्हं यायेगु ज्या राजभाई जकःमिं यानादी धयादिल। मल्ल के. सुन्दरं आः याकनं जुइत्यंगु ज्यापु महागुथिया निक्वःगु महाधिवेशनय् संसद दुने हयेत्यंगु काठमाडौं उपत्यका शहरी विकास विधेयकया कडा विरोध यायेमाःगु बिचाः प्वंकादिल। नेपाः राष्ट्रिय पार्टीया अध्यक्ष डा. केशवमान शाक्यं कवि दुर्गालालं बियादीगु अभिव्यक्तियात हे समर्थन यानादिल। ज्यापु संस्कृति विकास कोषया नायः चक्रमान डंगोलं ज्यापु दिवसयात सरकारी क्यालेण्डरय् नं दुथ्याकेमाःगु बिचाः प्वंकादिल। ज्याझ्वःया सभापति महागुथिया न्वकु राजभाई ज्यापुं जनकवि दुर्गालालजुं राजभाई जकःमियात बियादीगु अभिभारा पूवंकेत सम्पूर्ण ज्यापु जातिं कुतः यायेगु जुइ धयादिल ।
ज्याझ्वलय् शेषनारायण महर्जनं लसकुस यानादीगु खःसा बेखानारायण डंगोलं सुभाय् देछानादीगु खः। ज्याझ्वलय् सांस्कृतिक ज्याझ्वः नं न्ह्यब्वःगु खः ।
