जगत सुन्दरय् शान्ति सिरपाः
येँ (सन्ध्या टाइम्स)/थुगुसीया एसएलसीइ नेपालभाषा विषयय् दकलय् अप्वः ल्याः हःपिं जगत सुन्दर ब्वनेकुथिया विद्यार्थीतय्त म्हिगः छगू ज्याझ्वःया दथुइ 'शान्ति सिरपाः' लःल्हायेगु ज्या जुल। उगु सिरपाः छात्रपाखे नरेश महर्जन व छात्रापाखे सलिना महर्जनयात लःल्हाःगु खः। स्कूलया शिक्षिका शान्ति मानन्धरं स्वनादीगु उगु सिरपाः संस्कृतिविद् डा. सत्यमोहन जोशीं लःल्हानादीगु खः ।
उगु हे ज्याझ्वलय् मय्जु सबिता मानन्धरं थः मदुम्ह तता अम्बिका मानन्धरया नामं नीस्वंगु न्हूगु छात्रवृत्तिया लागिं छगू लख तका व बुद्धशरण मानन्धर डा. धर्मशरण मानन्धर, ई. गुहेश्वरी मानन्धर व अशोक मानन्धरं थः मां-अबुया नामं नीस्वंगु छात्रवृत्तिया लागिं दँय् झिंनिद्वः तका दां नं प्रधानाध्यापकयात लःल्हानादिल ।
ज्याझ्वलय् पाहांकथं झायादीम्ह पद्मरत्न तुलाधरं थःगु हे स्कूलया शिक्षिकां हे नीस्वंगु सिरपाःपाखें ब्वँमित उत्साहित जुइगु खँ कनादिल। स्कूलया प्रधानाध्यापक माया मानन्धरं नेपालभाषा व इच्छाधिन गणित मध्ये छगू ल्ययेमाःगु व्यवस्था यानातःगुलिं एसएलसीइ नेपालभाषा काइपिं विद्यार्थी म्हो जूगु खँ कनादिल।सल्लाहकार चुन्दा बज्राचार्यं लसकुस यानादीगु उगु ज्याझ्वः संचालक समितिया नायः लक्ष्मीदास मानन्धरया सभापतित्वय् न्ह्याःगु खः ।
