येँयाःया निंतिं तयारी शुरु
येँ (सन्ध्या टाइम्स)/येँयाः व्यवस्थापन यायेत म्हिगः जात्रा ११३१ समन्वय समितिं येँ महानगरपालिकाया निमित्त कार्यकारी अधिकृत देवेन्द्र डंगोलयात नाप लानाः ज्ञापन पौ लःल्हात ।
समितिया संयोजक सुजीव बज्राचार्यं ज्ञापन पौ लःल्हासें जात्राया इलय् शहरया दुनेया लँ मर्मत यायेमाःगु, सुचुकुचु व सतक मतया व्यवस्था याये माःगु माग यानादीगु खः।
निमित्त कार्यकारी अधिकृत डंगोलं सम्पदा, वातावरण व दलीय संयन्त्रं नापं येँयाःया नितिं मनपां थःगु हे कथंया तयारी यानावयाच्वंगु खँ कनादीगु खः ।
लिसें समितिं हनुमानध्वाखा प्रहरी परिसर प्रमुख केदार रिजाल व जनसेवा प्रहरी प्रभाग प्रमुख कवित कटवालयात नं नाप लानाः येँयाः झ्वलय् शान्ति सुरक्षाया व्यवस्था खँय् सहलह ब्याकूगु खः। कन्हय् जात्राया निंतिं स्वयं सेवक परिचालन यायेत मुँज्या च्वने त्यंगु दु ।
