रिजेन्द्रयात न्हापांगु रेटिङ्ग बुद्धिचाल उपाधि

येँ (सन्ध्या टाइम्स)/शुरुंनिसें न्हय्गूगु चरणतक अपराजित रिजेन्द्र राजभण्डारीं इन्द्रचोक क्लब खुल्ला फिडे रेटिङ्ग बुद्धिचाल त्याकूगु दु। न्हय्गूगु चरण तक अपराजित रिजेन्द्रं च्यागूगु चरणय् राजन पुरीं नापं बराबरी यायेवं उपाधि त्याकेत छन्हु पीमाःगु खः ।

उपाधि त्याकेत जूगु लिपांगु कासाय् नेपाल च्याम्पियन बद्रीलाल नेपालीयात बुकाः रिजेन्द्र उपाधि त्याकूगु खः। रिजेन्द्रया थ्व न्हापांगु रेटिङ्ग बुद्धिचाल उपाधि नं खः।
थ्व स्वयां न्ह्यः २०५५ व ०५७ सालय् प्ररायुसंघं ग्वसाः ग्वःगु बुद्धिचालय् न्हाप सिरपाः त्याके धुंकूम्ह रिजेन्द्रं छुं दँ न्ह्यः जक भारतया मुम्बई शहरय् जूगु मुम्बई मेयरकपय् नं अनरेटेडपाखे न्हाप उपाधि त्याके धुंकूगु दु ।

मकावनपुरय् जूगु कासाय् लिउ सिरपाः त्याकूगु खः।
उपाधिया निंतिं म्हिगः जूगु लिपांगु चरणया कासाय् बद्रीलालयात २३ चालय् बुकेत सफल जूगु खः। स्वीस लीग प्रणालीइ गुंगू चरण तक जूगु कासाय् रिजेन्द्र ८.५ अंकया लिसें उपाधि त्याकूगु खः। उपाधिया दावेदार बद्रीलाल रिजेन्द्र नाप बुइवं ६.५ अंकया लिसें खुगूगु थासय् लात।
कासाय् नेपाःया स्वम्हम्ह फिडे मास्टर सुजेन्द्रप्रसाद श्रेष्ठ न्हय्गू अंकया लिसें निगूगु थासय् लायेत सफल जुल। पुलांम्ह नेपाल च्याम्यिन नवीन तण्डुकार-स्वंगूगु, राजन-प्यंगूगु, फिडे मास्टर मनिष हमाल-न्यागूगु, अनरेटेड लेख बहादुर थापा-न्हय्गूगु, शुरवीर लामा-च्यागूगु, विजय डंगोल गुंगूगु व निरज निरौला झिगूगु थासय् लाःगु खः।
कासाय् विजयी जुयादीपिंत पुलांम्ह वडाध्यक्ष विकासभक्त श्रेष्ठ, नेपाल बुद्धिचाल संघया पुलांम्ह नायः सीताराम अग्रहरी, क्लबया अध्यक्ष कृष्णमान सिंह, मूपाहां सभासद नवीन्द्र राज जोशीया लिसें क्लबया पदाधिकारीपिंसं सिरपाः लःल्हानादीगु खः ।

त्वालय् हनीगु
न्हापांखुसी रेटिङ्ग बुद्धिचाल उपाधि त्याकेत सफल रिजेन्द्र राजभण्डारीयात थनया थाय्मदुइ च्वंगु शहीद शुक्र क्लबं थौं छगू विशेष ज्याझ्वःया दथुइ हनीगु जूगु दु।
क्लबया पुलांम्ह दुजः वय्कःयात थनया थाय्मदु दबुलीइ सार्वजनिक रुपं हनेगु ग्वसाः खलकं धाःगु दु ।