ताःचा लःल्हायेवं पिहां वःगु विवाद

शान्ति प्रक्रियायात थातय् लाकेगु न्हापांगु विश्वसनीय पलाः कथं माओवादीं थः लडाकुतय् ल्वाभः तयातःगु कन्टेनरया ताःचा विशेष समितियात लःल्हःगु विरोधय् स्वयम् माओवादीया हे उपाध्यक्ष मोहन वैद्य पक्षं सतक आन्दोलन समेत सुरु याःगुलिं देय्या शान्ति प्रक्रियाया भविष्य छु जुइगु खः धकाः आः थथें धाथे मफइगु अवस्था जूगु दु। थुकिया नापनापं न्ह्यानाच्वंगु शान्ति प्रक्रियायात सफल यायेगु ज्याय् प्रधानमन्त्री डा. बाबुराम भट्टराईयात मेपिंपाखें सिबें नं थःगु हे पार्टी दुनें पंगः पिहां वइगु स्पष्ट संकेत नं थुकिं बिउगु दु। डा. भट्टराईया लागिं दकलय् विडम्बना व ग्यानापुगु अवस्था थ्वहे खः धायेमाः। यदि पार्टी दुनें वय्कःयात असहयोग जुल धाःसा पिने च्वंगु शक्तितय्सं न्ह्याक्व हे तिबः बिउसां वय्कः ताःलाइगु सम्भावना मदु ।

मेगु खँ, विशेष समितियात ताःचा लःल्हायेगु ज्याया विरोधय् माओवादी दुनेया मोहन वैद्य पक्षं गुगु सतक आन्दोलन समेत यात, व नं बांलाःगु ज्या मखु। थुकियात कयाः वय्कलं थःगु पार्टी दुने हे संघर्ष यायेमाः। आखिर माओवादी लडाकुयात ला छन्हु सम्मानपूर्ण समायोजन यानाः उकियात मदयेकाः हे छ्वयेगु खः। बरु समायोजन यायेबलय् लडाकुया मनोबल कुहां वइगु वा उमित निराश याकेगु ज्या मजुइकेगुपाखे फक्व कुतः जुइमाः। नेपाली कांग्रेसं धाः थेंज्याःगु अपमानजनक खँत स्वीकार याये फइ मखु। उकी धाःसा संघर्ष यायेमाः। थज्याःगु ज्याया लागिं वय्कःपिंसं पार्टी व आः सरकार थःगु ल्हातय् दुसा सरकार नेतृत्वयात बल्लाकेमाः। यदि सरकार कमजोर जुल धाःसा माओवादीं न्ह्यःने हयाच्वंगु ज्याखँत नं कमजोर जू वनी ।

More Stories Like this