थौं नेवाः देय् दबूया झिंन्हय्क्वःगु बुन्हि

नेवाःतय् राष्ट्रिय संगठन नेवाः देय् दबूया झिंन्हय्क्वःगु बुन्हि । थौं थीथी ज्याझ्वः यासें हनाच्वंगु दु । ने.सं.१११५ सं भाषिक सांस्कृति व जातिय मुद्दायात ज्वनाः नीस्वंगु नेवाःतय् संगठन नेवाः देय् दबूलिं हिलावंगु सामाजिक व राजनीतिक परिवेश कथं राजनीतिक मुद्दा ज्वनाः नेवाःतय्त जागरुक यायेगु ज्याय् निरन्तर न्ह्यानाच्वंगु खः ।

देय् दबूया प्यक्वःगु तःमुँज्यापाखें संघीय लोकतान्त्रिक नेपाः नापं आत्मनिणर्यया अधिकार व अग्राधिकार सहित नेवाः राज्य पलिस्था यायेगु कथं थःगु विधान नं पारित यायेधुंकूगु दु ।

नेवाः देय् दबूया हे पहलय् प्रमुख राजनीतिक दलया नेवाः भातृ संगठन नापं नेवाः जातीय खलः पुचः दुथ्याकाः नेवाःतय् राजनीतिक हक अधिकार सुनिश्चित यायेत नेवाः स्वायत्त राज्य मंकाः संघर्ष समिति नीस्वंगु खः ।

देय् दबूया बुन्हिया लसताय् थौं झिंछताः इलय् येँया परोपकार स्कूलय् थीथी सांस्कृतिक ज्याझ्वःलिसें बुन्हिया हे लसताय् पिथंगु लुमन्ति पौं या नं बिमोचन जुइगु जूगु दु । बुन्हिया हे लसताय् म्हिगः येँय् वंघलय् हिदान ज्याझ्वः नं जूगु खः ।

More Stories Like this