बुद्धिचाल कासाया उपाधि रिजेन्द्र राजभण्डारीयात

इन्द्रचोक क्लब खुल्ला फिडे रेटिङ्ग बुद्धिचाल प्रतियोगिताया उपाधि काठमाण्डौं चेस क्लबया रिजेन्द्र राजभण्डारीं त्याकूगु दु । वय्कलं कासाय् नेपाल च्याम्पियन बद्रीलाल नेपालीयात बुकूगु खः ।

अथेह फिडे माष्टर सुजेन्द्र प्रसाद श्रेष्ठं पुलांम्ह नेपाल च्याम्पियन सुरवीर लामायात बुकाः न्हय्गू ल्याः लिसॆं निगूगु थासय् च्वनेत ताःलाःगु खः । पुलांम्ह नेपाल च्याम्पियन नवीन तण्डुकारया नं न्हय्गू ल्याः जूसा नं डाइरेक्ट इन्काउन्टरया लिधंसाय् श्रेष्ठ निगूगु थासय् लाःगु खः । लियांलिउ लाःम्ह नवीन तण्डुकारं मखन चेस क्लबया राजन पुरीयात बुकूगु खः ।

अथेहे राजन पुरी प्यंगूगु थासय् लाःगु दुसा फिडेमाष्टर मनीष हमाल, नेपाल च्याम्पियन बद्रीलाल नेपाली, कान्तिपुर चेस क्लबया लेख बहादुर थापा मगर, मच्छिन्द्र क्लबया सुरवीर लामा, अन्नपुर्ण उच्च माध्यामिक विद्यालयया विजय डंगोल व ध्रुवतारा स्पोर्टिङ्ग क्लब दमकया निरज निरौला छसिकथं न्यागूगु निसें झिगूगु थासय् लाःगु खः । अनेरेटेडपाखे सुदीप बज्राचार्य न्हाप व सप्तरीया मनोज विक निगूगु थासय् लाःगु खः । झिंन्हय्गू जिल्लाया मुक्कं ख्वीन्हय्म्ह कासामितयसं ब्वतिकाःगु थुगु कासा भाद्र १२ गतेनिसें न्ह्याःगु खः ।

इन्द्रचोक क्लबया नायः कृष्णमान सिंहया सभाध्यक्षताय् शनिवाः जूगु समापन ज्याझ्वलय् सभासद नवीन्द्र राज जोशीं कासा त्याकादीपिन्त सिरपाः लःल्हानादीगु खः । न्हाप लाःम्हेसित झिंछद्वःतका, लिउयात च्याद्वः तका व लियांलिउयात खुद्वःतका सिरपाः लःल्हानादीगु खः । ज्याझ्वलय् नेपाल बुद्धिचाल संघया पुलांम्ह नायः सीताराम अग्रहरी, येँ २५ वडाया पुलांम्ह नायः विकासभक्त श्रेष्ठया उपस्थिति दुगु खः ।

More Stories Like this