सांसद

सुजिता माःजु
निर्मला खुदँ दुबले हे वयात अतिकं मतिना याइम्ह वया मामं संसार त्वतावन । छेँय् स्वइपिं सुं मदया खः वा छु खः मस्यू वया अबुम्हं मेम्ह हे मिसा छेँय् दुत हल । न्हूम्ह मां । थः मांया थाय् काःम्ह मां । निर्मलां थः मां ल्वमंकल । चिर्मांयात थः मां ताय्कल । चिर्मांम्हेसिया नं निर्माला यः । चसिचा ख्वाः, न्हिलिबले न्यताः दुहाँ वनीगु । निर्मलाया रुपात्मक सौर्न्दर्यताया न्ह्यःने न्हय्गू जन्मया शत्रुं नं छ्यं क्वछुकी ।

ई बिनावन । निर्मलाया चिर्मां छेँय् दुहाँ वःगु निदँ क्यंबले निर्मलां केहेँया ख्वाः स्वयेखन । केहेँम्ह नाप म्हितेखंबले निर्मलाया गुबलें गुबलें स्कूल हे वनेगु च्यूता मदु । स्कूल मवनकि चिर्मां हालेयः, ब्वःबीयः । उकिं चिर्मांया त्रासं नं निर्मला स्कूल वनी । शिक्षाय् निर्मलाया लगाब खनाः मांअबु निम्ह दंग । निर्मलाया स्वणिर्म भविष्यय् निम्हं ढुक्क ।

ई । घुसुं न्ह्याई । मानौं सरल, सरस, सहज । काल्पनिक दुनियाँय् म्वाइपिनिगु निंतिं ई छुं मखु । इमिगु निंतिं ई न्ह्याइ मात्र न्ह्याइ । तर वास्तविक जीवनलिसें साक्षात्कार याय्माःपिनिगु निंतिं ई चलः खः, क्वब्वाःलः खः । ई न्ह्याःलिसें निर्मलाया जीवनय् नं चलः वय्गु सुरु जुल । निर्मला झिंनिदँया बैशय् थ्यंसानिसें चिर्माम्हं निर्मलायात स्वय्गु मिखाय् खसुं भुन । प्यदँ दुम्ह केहेँ छ्याकः, हाकु । हिसि मदु । निर्मला व वया केहेँ नापं च्वनीबले छम्ह क्वः व मेम्ह ब्वः धकाः सकसिनं लनेगु याइबले चिर्मांया नुगः मुइगु स्वाभाविक खः । निर्मलाया धाःसा वया केहेँ यः । केहेँम्हेसिया नं तता यः । आः चिर्मांया फयांफक्व निर्मलायात स्कूल मछ्वयेगु कुतः याइ । वया मांया मतिनाय् छाय् हिसु वल । निर्मला अनभिज्ञ । मां व न्ह्यसुम्ह्याय्या द्वन्दं निर्मलाया अबु उदेक चाः ।

आः निर्मला न्हापायाम्ह निर्मला मखुत । चिर्मां नाप ल्वाल्वां ल्वाय्सयेकूम्ह निर्मला ......थौं न्ह्याम्ह नाप नं ल्वाये मग्यात । निर्मलाया व्यवहारय् वःगु परिवर्तनं वयागु भविष्य अन्धकारमय जुइगु निश्चित । उकिं निर्मलाया भविष्यप्रति अबुम्ह न्ह्याबलें चिन्तित ।

निर्मला १४ दँ दत । मचाल्यासी । नयेत्वनेगु च्यूतालं मखु । चिर्मांनापया ल्वापुं ग्रसित जीवनयात हाकुतिनां अबुम्हं निर्मलायात सांसदया छेँय् थौं त्वःतेहल । २०६२/६३ सालं प्राप्त जूगु संविधान सभाया छम्ह सांसद । न्हू नेपाःया न्हू संविधान दय्केगु ज्याय् ब्यस्तम्ह सांसद । निर्मला सांसदया छेँय् । न्हूगु संसारय् ।

सांसदज्यूया कलाः छम्ह दु - रेजिना । सांसदया छेँय् निम्हतिपु जक । सांसदया छेँय् निर्मलां यायेमाःगु ज्या छुं मदु । छेँ सुचुपिचु यायेगु, सुथय् बहनि ज्यनाः व बेलि थुयाः सांसदत्यपुयात लुधंकेगु । बस थुलि हे ।

उर्लाबारीया छगू गामय् ब्वलंम्ह निर्मला, येँया चहलपहलं गुबलें गुबलें झुमिं यंकी । त्वलेहे जुयाच्वनी । टि.भि.या संसारय् उर्लाबारी मालाच्वनी । गोरखापत्रय् थः अबु मालाच्वनी । आखिर वयागु आत्मायात टि.भि., पत्रिका, रेडियो छुं नं साधनं पूवंके मफुत । निर्मला येँया कोलाहल संसारय् नं याकःचा जुल । सांसद व रेजिनां निर्मलायात लय्ताय्केगु कुतः मयाःगु मखु । प्रत्येक शनिवार निर्मलायात येँया थीथी थासय् चाःहिकेत ब्वनायंकी । सिनेमा क्यने यंकी । अथेनं निर्मलां थःत लुधंके मफु । निर्मलाया न्ह्याबलें ख्युंख्वाः । ख्वःसलं भुंगु निर्मलाया जीवन । ज्या याकेत मखुम्ह हे मचा चूलात धैथें सांसदज्यू व रेजिनाया दथुइ खँ जुइगु । अथे धकाः निर्मलां ज्या हे स्यंकूगु नं मखु । माःगु ज्या फुक्क यानाच्वंगु हे दु । मात्र वया नुगः चमकं । चमकंगु नुगलं याःगु ज्या धाःसा चमकं धायेमछिं । छेँज्या यायेत तयातःम्ह छम्ह मिसामचाप्रति सांसदया सद्भाव खनाः कार्यकर्तात अजूचाः । फुक्क कार्यकर्तातय्सं छप्वाः म्हुतुं धाइ -'सकलें सांसदत थथे हे चकंनुगःया चकंद्यः जूसा गुलि ज्यू ।'

- निर्मला सांसदज्यूया छेँय् ज्या यायेत वःगु नं खुला दत ।
- निर्मला थौंकन्हे लय्ताः ।
- उर्लाबारी वयागु नुगलं तापात ।
- अबुया लुमन्तिं वयागु नुगः न्ह्यःने तय्जु याःमवल ।
- निर्मला चंचं धाः ।
- निर्मला चन्तांमन्तां लाः ।
- उर्लावारीया स्वतन्त्र फसय् म्वायेगुसिबें येँया भ्वातिं जीवन हे निर्मलायात न्ह्याइपु ताल ।
- छता ज्या ब्वःसा निता ज्या यायेत निर्मला तयार जुइम्ह जुल ।
- सांसदज्यूया पार्टी कार्यकर्तात वइबले नं निर्मलां प्याखंपाः काकां पलाः छिनाजुइम्ह जुल ।
- निर्मलाया न्हिलासुं सांसदया छेँ हे न्ह्यूख्वाः वः, झः झः धाः ।
- कार्यकर्तातय् सांसद नापलायेगु त्वहचिनाः निर्मलाया दर्शन याःवइपिं जुल ।
- सांसदया छेँ निर्मलाया निंतिं देगः जुल ।

थौं कण्डम दिवस । कण्डम दिवसया उपलक्षय् सरकारी अफिस फुक्कं बन्द । प्रत्येक टि.भि. च्यानल व पत्रपत्रिकाया हेडलाइन हे कण्डम । सांसदज्यू, रेजिना व निर्मला स्वम्ह जक छेँय् । चाःहिलेगु इमिगु ज्याझ्वः मदु । कार्यकर्ता नं छेँय् वःपिं मदु । छेँय् वःपिं सुं मदुगु इलय् लाकाः सेफ्टिटैंकी सफा यायेगु इमिसं क्वछित । सेफ्टिटैंकीया फोहर मुंकाः यंकेत मनू सःतल । मनू वल । सेफ्टिटैंकी चायेकल । फोहर मुनेगु ज्या यात । अनायास फोहर मुनाच्वंम्ह मनू हालाहल -'थौं ला छु खः न्ह्याथासं कण्डम यै कण्डम जक ।' लज्जा मचासें पतिंचां सुसुं हाकनं धाल -'कण्डमं जाःगु टैंकी ।'

- त्वलेजुयाः स्वयाच्वंम्ह रेजिनां तिजक धाल -'टैंकीइ सुनां कण्डम तल ।'
- ख्वाः ह्याउँपाउँ यायां सांसदं तीजक लिसः बिल -'कार्यकर्तातय्गु ज्या जुइका ।'
- निर्मलां अजूचाचां म्हुतुप्वाः चायेकल -'तिनातःगु टैंकी दुने सुनां कण्डम तलजुइ मस्यू -'

तिनातःगु सैफ्टिटैंकि दुने कण्डम गनं वल । इपिं स्वम्हसिनं थःथवय् ख्वाः स्वस्वं अनभिज्ञता प्वंकाच्वन ।

Related Stories

जः
ल्यासिपिं ल्यत्तु ल्यः जुया

More Stories Like this

बाखं च्वये मखुनी
परिवेश (मुक्तक बाखं)
बायावंगु लँपु
हेँग्वाः जूम्ह मनू
ब्लू-डल बाखं ब्वनेधुंकाः