भट्टराई त्यायेवं राष्ट्रपतियात फोन

येँ (सन्ध्या टाइम्स)/माओवादीया माओवादी हे पहः जुइगु जुयाच्वन, चाहे व प्रचण्ड जुइमा वा बाबुराम। घटना उकुन्हु प्रमया चुनाव जू कुन्हुया खः। संसदय् प्रधानमन्त्री ल्ययेत जुयाच्वंगु चुनाव सनिलया ५.३० बजे क्वचाल। नव निर्वाचित प्रम बाबुराम भट्टराई संसद दुने बधाई हे कयाच्वन तिनि, मेखे वय्कःया छम्ह सहयोगीं काचाकाचां राष्ट्रपति भवनय् फोन यानाः धयाछ्वत खनिं, 'थन सदनय् डा. बाबुराम भट्टराई चुनावय् त्यायेधुंकल, सपथ ग्रहण थौं हे बहनी याये माली।'
राष्ट्रपति भवनं लिसः बिया हल, 'प्रधानमन्त्रीया सपथ ग्रहण धइगु पार्टीया सपथ ग्रहण थें मखु, थुकिया लागिं तःधंगु तयारी यायेमाः, सैनिक टुकडी सःतेमाः, विदेशी कुटनीतिक नियोगयात सःतेमाः, फुक्क पार्टीया नेतातय्त सःतेमाः। कन्हय् मजुइक थ्व तयारी याये फइ मखु।'
भट्टराईया सहयोगीं धाल, 'अय्सा कन्हय् सुथय् ९ बजे याये ला?'
'सुथय् ९ बजे नं फइ मखु।'
'१० बजे ले?'
'१० बजे नं फइ मखु।'
'अय्सा गबलय् फइ ले?'
तसकं हथासं याःसां नं न्हिनय् १ बजे मजुइक फइ मखु।'
'अय्सा १ बजे हे यानादिसँ।'
१ बजे यायेगु सहमति जुइवं राष्ट्रपति भवनपाखें चांचां तयारी सुरु यात। कुटनीतिक नियोग लगायत थीथी पार्टीया नेतातय्त पौ छ्वयेगु, सेनाया टुकडी सःतेगु आदि फुक्क ज्या जुल। तसकं हथासं ज्या जूगुलिं गुलिखे नेतातय्त पौ तकं मथ्यं। पौ मथ्यंपिं मध्ये एमालेया नेतात माधव नेपाल, केपी ओली तकं लात। अथे खःसां ज्याझ्वलय् निवर्तमान प्रम लिसें एमाले अध्यक्ष झलनाथ खनाल थ्यंगुलिं धाःसा एमालेया प्रतिनिधित्व धाःसा जू वन।