कन्टेनरया ताःचाः लःल्हाःगुलिं किरण पक्षया आन्दोलन

येँ(सन्ध्या टाइम्स)/माओवादी बरिष्ठ उपाध्यक्ष मोहन बैद्य किरण नापं केन्द्रीय पदाधिकारीया बहुमत नेतातय्सं थौं माओवादीया हे नामं सुथय् साढे ९ बजेनिसें १ घण्टा देय्न्यंकं चक्का जाम यात।
केन्द्रीय पदाधिकारीपिं किरण, मेम्ह उपाध्यक्ष नारायणकाजी श्रेष्ठ प्रकाश, महासचिव रामबहादुर थापा बादल, सचिव सीपि गजुरेल पक्षधरं थौं चक्काजाम याःगु खः। थ्व पक्षधर कार्यकर्तातय्सं थौं सुथय् येँया रत्नपार्क, न्हूबानेश्वर, महाराजगञ्ज, बालाजु, चाबही, कलंकी, ग्वंगःबुँ, बानेश्वर, गठ्ठाघर, कुपण्डोल, लगंख्यः, ग्वार्कोय् चक्काजाम याःगु खः।
थौंकन्हय् माओवादी दुने न्हय्म्ह केन्द्रीय पदाधिकारी दु। इपिं मध्ये अध्यक्ष प्रचण्ड, उपाध्यक्ष एवं प्रम डा. भट्टराई व सचिव पोष्टबहादुर बोगती जक कन्टेनरया ताःचा लःल्हायेमाः धइगु पक्षयापिं खः।
चक्का जामया कारणं थौं स्वनिगः नापं देय्न्यंकं यातायातय् पंगः ब्वलंगु दु। माओवादी लडाकुतय् ल्वाभः तयातःगु कन्टेनरया ताःचा सेना समायोजन विशेष समितियात लःल्हाःगु विरोधय् सांकेतिक विरोध कथं थ्व चक्का जाम याःगु खः। थौं बहनी साढे ६ बजे देय्न्यंकं मसाल जुलुस नं पिकाइगु ग्वसाः दु। मसाल जुलुस येँया रत्नपार्क, यलया लगंख्यः,ख्वपं पिहां वइ।
माओवादी अध्यक्ष प्रचण्ड व उपाध्यक्ष भट्टराईनं पार्टीया निर्णय विपरित कन्टेनरया ताःचाः लःल्हाःगु धइगु किरण पक्षया द्वपं दु। बैद्य पक्षं विरोध यायेक यायेक नं वंगु चान्हय् न्हय्गू शिविर मध्ये प्यंगू शिविरया कन्टेनरया ताःचा लःल्हाःगु खः। थ्वहेदथुइ एकीकृत माओवादी स्थायी समितिया बैठक थौं च्वंगु दुसा उगु बैठकयात बैद्य पक्षं बहिष्कार याःगु दु।
उखे पार्टी दुने ब्वलंगु थ्व कचवंया लिच्वः माओवादीं पिथनाच्वंगु थीथी पत्रपत्रिकाय् नं लाः वनाच्वंगु खँ सीदुगु दु।
प्रचण्डया अपील
माओवादी अध्यक्ष प्रचण्डं थौ छगू अपील पिकासें कन्टेनरया ताःचा लःल्हायेगु ज्या पार्टीया निर्णय कथं हे जूगु खः धकाः दावी यानादीगु दु। उपाध्यक्ष मोहन बैद्यं म्हिगः पिकाःगु वक्तव्य पार्टी पद्धति व निर्णयया अःखः खः धासें कार्यकर्ता, लडाकु व आम जनसमुदायात उत्तेजित मजुइत नं वय्कलं इनाप यानादीगु दु। अपिलय् माओवादीया वंगु असार १० गते निसें श्रावण ९ गते तक च्वंगु केन्द्रीय समितिया बैठकं शान्ति प्रक्रिया व संविधान निर्माण प्रक्रियायात न्ह्याकेगु धकाः सर्वसम्मत निर्णय याःगु नापं वहे निर्णयया परिधिइ च्वनाः भाद्र ८ गतेया स्थायी समिति बैठकं न्यागू बुँदाया प्रस्ताव नापं प्रतिबद्धता प्वंकेगु ज्या जूगु खँ न्ह्यथनातःगु दु। अथे हे माओवादी नेतृत्वया सरकार गठन वयेवं हे लडाकु व कन्टेनरविशेष समितियात लःल्हायेगु निर्णय जूगु खँ नं उकी न्ह्यथनातःगु दु।