किरण पक्षया नोट अफ डिसेन्ट
ताःचा लःल्हायेगु खँय् माओवादी दुने विवाद
येँ (सन्ध्या टाइम्स)/एकीकृत माओवादी स्थायी समितिया बैठकं लडाकुत व ल्वाभः तयातःगु कन्टेनर फुक्कं सेना समायोजन विषय समितियात लःल्हायेगु धकाः निर्णय याःसां आखिर पार्टीया हार्ड लाइनर धकाः नालातःम्ह उपाध्यक्ष मोहन बैद्य पक्षं धाःसा नोट अफ डिसेन्ट च्वःगु दु ।
छुं दिं न्ह्यः जक माओवादी स्थायी समितिया बैठक च्वनाः शान्ति प्रक्रिया पूवंकेगु नितिं लडाकुतय्गु पुनवर्गीकरण यायेगु नापं कन्टेनरया ताःचा सेना समायोजन विशेष समितियात लःल्हायेगु निर्णय याःगु खः ।
कन्टेनरया ताःचा लःल्हायेगु थ्व निर्णय माओवादी स्थायी समितिया बहुमतं याःगु जूसां वास्तवय् उपाध्यक्ष किरण, विप्लब, सीपि गजुरेल, देव गुरुङ लगायतया नेतातय्सं धाःसा नोट अफ डिसेन्ट च्वःगु खँ माओवादी छम्ह नेतां धयादीगु दु ।
पार्टीया छुं वरिष्ठ नेतातय्सं नोट अफ डिसेन्ट च्वःसां बहुमतया आधारय् उकियात कार्यान्वयन याना वनेगु तयारी माओवादीं याःगुलिं कार्यकर्तात धाःसा चिन्तित जुया वःगु दु ।
उपाध्यक्ष किरण पक्षधरं आःया अवस्थाय् थःपिंसं असहमति प्वंकाः छुं ईया नितिं न्ह्याः वनेगु रणनीति दयेकूगु सीदुगु दु। माओवादी दुनेया लाइन संघर्षया झ्वलय् छुं दिं न्ह्यः जक यलया धोबिघाटय् प्रचण्ड पक्षधर बाहेक किरण, बाबुराम भट्टराई व नारायणकाजी पक्षधर नेतात सहलह यानाः छगू कथंया मोर्चा दयेकूगु खःसा आः उगु मोर्चा त्वाः दल धकाः तकं माओवादी कार्यकर्तातय्सं धयाहःगु दु ।
थौं नं सरकार विस्तार मजुल
प्रधानमन्त्री डा. बाबुराम भट्टराईनं थौं विहीवाः मन्त्रिमण्डल विस्तार यानाः उकियात पूर्णता बीगु धकाः तयारी यानादीगु खःसां थौं थ्व ज्या धाःसा मजुइगु जूगु दु। झिंछगू मन्त्रालय ल्हातय् लाकूगु मधेसी मोर्चा दुने सुयात छु मन्त्रालय बीगु धइगु निर्णय याये मफयाः मन्त्रिमण्डल विस्तार लिबाः वनाच्वंगु खँ धाःगु दु। माओवादी दुने नं आः तक मन्त्रालय इनेगु खँ क्वचाये फयाच्वंगु मदुनि। डा. भट्टराईनं थौं मन्त्रिमण्डल विस्तारया लागिं वयेफु धकाः राष्ट्रपति भवनय् नापं धयातःगु खःसां थौं थ्व ज्या धाःसा मजुइगु खँ धाःगु दु ।
