प्रम बाबुराम भट्टराई समक्ष नेवाःतय्गु थीथी माग
येँ (सन्ध्या टाइम्स)/न्हूम्ह प्रधानमन्त्री डा. बाबुराम भट्टराईयात नेवाः स्वायत्त राज्य मंकाः संघर्ष समितिपाखें म्हिगः नापलानाः नेवाःतय् लागिं यायेमाःगु थीथी ज्याखँ बारे कनेगु ज्या जुल। संघर्ष समितिया उगु पुचलं प्रम भट्टराई समक्ष आः संशोधन यानाः जक पेश यायेगु धयातःगु बजेटय् नेपालभाषा ख्यः विकासया लागिं कोष दयेकेत इनाप याःगु खःसा वय्कलं थम्हं उकथंया पहल यायेगु बचं बियादीगु खः। संघर्ष समिति सचिवालय कजि मल्ल के. सुन्दरं प्रम भट्टराई समक्ष नेवाःतय् थीथी माग न्ह्यब्वयादीगु खः ।
उगु प्रतिनिधिमण्डलं पुलांम्ह प्रम पुष्पकमल दाहाल प्रचण्डया पालय् तत्कालिन अर्थमन्त्री डा. भट्टराईया पहलय् गठन जूगु गुठी संस्थानया औचित्य व नेवाः संस्कृति संचालनय् खनेदुगु समस्या सम्बन्धी अध्ययन समितिं लःल्हाःगु प्रतिवेदन कार्यान्वयन यायेत नं इनाप याःगु खः।
प्रतिनिधि मण्डलिसे खँ ल्हासें डा. भट्टराईनं थः अर्थमन्त्री जुयाच्वंगु इलय् यानागु छुं ज्याया कारणं थःत नेवाः विरोधी कथं चित्रित यात धासें ताः ई निसें जाति व भाषा उत्थानया निंतिं ल्वानाच्वम्ह मनू नेवाः संस्कृतिया विरोधी जुइ फइ मखु धयादिल ।
उकथं हे प्रतिनिधिमण्डलं संघीय राज्य घोषणा जुइत्यंगु इलय् स्वनिगःयात मेट्रोपोलिटन सिटी दयेकेगु व नेवाःतय्त हे अल्पमतय् लाकेगु कथं नगरपालिका घोषणा यानाच्वंगु ज्या तत्काल दिकेत नं इनाप याःगु खः। प्रतिनिधिमण्डलं न्हूगु सरकारय् स्वनिगःया नेवाःतय्त नं मन्त्री दयेकेत इनाप याःगु दु ।
प्रतिनिधिमण्डलय् संघर्ष समितिया वर्तमान नायः डा. चुन्दा बज्राचार्य, सचिवालय कजि मल्ल के सुन्दर, सल्लाहकारपिं प्रा माणिकलाल श्रेष्ठ, हितमान शाक्य, दिलीप महर्जन, प्रेमशान्ति तुलाधर लगायत दुजःपिनि नं उपस्थिति दुगु खः ।
