भिंतुना विज्ञापन मबीत निर्देशन
येँ (सन्ध्या टाइम्स)/प्रधानमन्त्री डा. बाबुराम भट्टराईनं सरकारी कार्यालयपाखें थःत भिंतुना विज्ञापन बीगु ज्या दिकेत मुख्य सचिव माधवप्रसाद घिमिरेयात निर्देशन बियादीगु दु ।
प्रधानमन्त्रीया निर्देशन कथं थौं हे फुक्क सरकारी कार्यालययात अथे विज्ञापन मबीत सर्कुलर छ्वइगु जूगु दु। विज्ञापन यानाः सरकारी ध्यबा फुकेगु ज्या जुयाच्वंगु खँय् चिउताः तसें प्रम भट्टराईनं उगु निर्देशन बियादीगु खः। प्रधानमन्त्री डा. बाबुराम भट्टराईनं पुलांपिं राजामहाराजातय्त थें थःत चाकडी यायेमाःगु अवस्था मदुगुलिं कर्मचारीतय्सं इमानन्दार जुयाः जनताया नितिं ज्या यायेमाल धकाः नं मुख्य सचिवयात निर्देशन बियादीगु खः। वय्कःया निर्देशन लिपा आः सरकारी कार्यालयपाखें सरकारी कोषया खर्चं पत्रपत्रिका व संचारमाध्यमय् भिंतुना विज्ञापन मवइगु जूगु दु ।
