जनबहालय् पँय्ताः बाजंया प्रशिक्षण
येँ (सन्ध्या टाइम्स)/जनबहाःया गुरुजु निलकाजी शाक्य लगायत कसाः दाजुकिजापिनि सक्रियताय् म्हिगःनिसें पँय्ताः बाजं पुइगु प्रशिक्षण न्ह्याःगु दु। लछियंकं न्ह्याइगु उगु ज्याझ्वलय् मुक्कं झिंन्हय्म्ह प्रशिक्षाथीय्सं ब्वति काःगु दुसा भाजु भगिरत्न कसाः मूगुरु जुयाः भाजुपिं चिनिकाजी ताम्राकार व स्वतन्त्र बहादुर ताम्राकारपिंसं प्रशिक्षण बियादीगु दु ।
पँय्ताः बाजं लोप जुयावनीगु अवस्थायात ध्यानय् तयाः थःगु परम्परागत बाजं संरक्षण यायेगु मू आज्जुं थुगु अभियान न्ह्याकूगु खँ गुरुजु निलकाजी शाक्यं 'सन्ध्या टाइम्स'यात कनादिल। वय्कलं पँय्ताः नापं क्वताः (बाजं) थायेगु नं स्यनीगु खँ कनादीगु दु ।
गुंलालछि, कार्तिकलछि जन बहाःद्यःयाथाय् पँय्ताः पुइमाःगु चलन दु। अथे हे जनबहाःद्यःया रथ जात्रा, न्हवं लगायत विशेष पर्वय् नं पँय्ताः बाजं मदयेकं मगाः। तर थौंकन्हय् पँय्ताः पुइसःपिं मनूत हे मदयेधुंकूगु अवस्था दु ।
