बसन्तपुली ३६० कुमारी पुजा
येँ (सन्ध्या टाइम्स)/ श्री श्री श्री कुमारी भक्तजन सेवा समिति परिवारया ग्वसालय् वंगु मंगलवाः बसन्तपुली स्वसः व ख्वीम्ह कन्या पुजा जुल। मूम्ह कुमारी न्हापां पुजा यानाः न्ह्याकूगु उगु पुजा समारोहय् पुजा याःपिं कन्या मस्तय्त प्रसाद लःल्हायेगु लिसें नेवाः परम्पराकथं ख्येँ सगं बीगु ज्या नं जूगु खः ।
श्रद्धालु भक्तजनतय्सं कन्या मस्तय्त चकलेट, बिस्कुट, मरि, ध्यबा आदि वस्तु नं छाःगु खः। देशय् शान्ति जुइमा धयागु कामना यासें स्वदँ न्ह्यवंनिसें थुगु ज्या न्ह्याका वयाच्वंगु खँ ग्वसाः खलकं धाःगु दु। थज्याःगु कन्या पुजाय् ब्वति कायेकाः मस्तय् पुजा यात धाःसा मस्तय्त छुं नं कथंया ल्वचं कइ मखु धइगु जनविश्वास दु ।
