थ्व सरकारय् तकं मन्त्रालयया लोभ

तसकं म्हो जक ईया लागिं गठन जूगु सरकारय् तकं सु मन्त्री व सु उपप्रधानमन्त्री जुइ धइगु खँयात कयाः विवाद जुयाच्वंगु बांलाःगु खँ मखु ।

सरकारयात समर्थन यानाच्वंगु मधेसवादी दलत जक मखु, सरकारया नेतृत्व यानाच्वंगु माओवादी दुने तकं मन्त्री जुइगु लागिं पिहां वःगु थ्व कचवनं अन्ततः वर्तमान सरकारप्रति जनतां गुगु विश्वास याना हयाच्वंगु खः, उकियात क्वपालीगु खँय् शंका मदु। नवनिर्वाचित प्रधानमन्त्री डा. बाबुराम भट्टराईनं स्पष्ट भासं धयादी धुंकूगु दु, थ्व सरकारया न्हापांगु ज्या धइगु हे शान्ति स्थापना व संविधान निर्माण खः। जनतायात राहत बीगु ज्यायात सरकारं स्वंगूगु प्राथमिकताय् लाका तःगु दु। लिसें वय्कलं धयादी नं धुंकूगु दु, आः वइगु लत्याया दुने नं छुं उल्लेख्य ज्या याये मफुत धाःसा थ्व सरकार स्वला न्ह्यः हे विघटन जुइ। थज्याःगु तसकं चीहाकःगु ईया लागिं वःगु सरकारय् वनेत तकं दलतय् दुने ब्वलंगु कचवं वास्तवय् छुं नं कथं स्वस्थकर मखु ।

थःगु पार्टीपाखें सरकारय् सुयात छ्वयेगु व सुयात मछ्वयेगु धकाः निर्णय यायेगु जिम्मा प्रम भट्टराईनं पार्टी अध्यक्ष प्रचण्डयात त्वःता बिउगु दु। तःधंगु मन्त्रालयत फुक्क मधेसवादी पार्टीतय् ल्हातय् लाः वंगुलिं माओवादीं सरकारय् वनेत खास हे रुची क्यना च्वनेमाःगु आवश्यकता नं मदु। मधेसवादी दलतय्सं थःपिनि आकार कथंया मन्त्रालय काये खनाच्वंगु हे दु। उकी नं विवाद यायेगु खःसा थ्व नेताय् लोभीपापी चरित्रया लिच्वः जक खः। थज्याःगु अन्तिम अवसर प्रयोग यायेत वयाच्वंगु सरकारय् मन्त्रालयया लोभ सुनां नं मक्यंसा हे बांलाः ।

More Stories Like this