यँयाः न्यायेकेत समिति
येँ/येँया दकलय् तःधंगु नेवाः म्हसीका दुगु जात्रा यँयाः तःजिक हनेगु निंतिं नेवाः जागरण मञ्चया ग्वसालय् क्षेत्रपाटी पार्टी प्यालेसय् जूगु बृहत् भेलां मञ्चया संयोजक सुजीव बज्राचार्यया संयोजकत्वय् येँयाः जात्रा ११३१ समन्वय समिति नीस्वंगु दु। उगु भेलाय् येँयाः जात्रा जुइगु स्वनिगः दुनेया थीथी क्लब, संघ संस्थाया प्रतिनिधिलिसें जात्राय् ब्वति काइपिं जात्राया प्रतिनिधित उपस्थित जूगु खः ।
उगु समन्वय समितिं कुमारी, भैरव, गणेशया खः सालेगु रुटया लँ मर्मत यायेगु निंतिं सम्बन्धित निकायय् डेलिगेशन वनेगु, अथे हे जात्राजःछि लोडसेडिङ मुक्त यायेगु, शान्ति सुरक्षाया व्यवस्था यायेगु निंतिं डेलिगेशन वनेगु निर्णय नं याःगु दु। लिसें स्वयम्सेवक व्यवस्थितरुपं परिचालन यायेगु, जात्राय् नेवाः सहभागिता अप्वयेकेगु व जात्रा पर्वय् जुइगु राजनीतिकरणयात मुक्त यायेगु अभियान न्ह्याकेगु निर्णय नं याःगु दु ।
अथेहे थ्वहे वइगु शनिवाः येँयाः जात्रानाप सम्बन्धित गुथि संस्थान, महानगरपालिका, प्रहरी, ट्राफिक प्रहरी, इन्द्रजात्राय् सहभागी गुथि व इन्द्रजात्रा व्यवस्थापन समितिया पदाधिकारीत सःताः बृहत अन्तर्क्रिया ज्याझ्वः यायेगु निर्णय नं याःगु दु ।
येँयाः जात्रा समन्वय समितिया संयोजक बज्राचार्ययालिसें उपसंयोजकय् मनोज नेवाः, अथेहे दुजलय् नेवाः राष्ट्रिय मुक्ति मोर्चापाखें ईश्वरदास मानन्धर, लगं खलःपाखें सुवर्ण शाक्य, ज्याःबहाः ल्याय्म्ह पुचःपाखें निरोज बज्राचार्य, मरुत्वाः पुचःपाखें बिष्णु श्रेष्ठ, कुमारी क्लबपाखें राजकल्याण ताम्रकार, महादेव मखन क्लबपाखें इन्द्रमणि कपाली, तारिणी मखन क्लबपाखें राजन महर्जन, गंगा क्लबपाखें डिगम्बर श्रेष्ठ, स्टार क्लबपाखें चन्द्रकुमार महर्जन, नेवाः जागरण सुरक्षा मञ्चपाखें राजेश्वर स्थापित, असन सेवा समितिपाखें यज्ञरत्न तुलाधर, मच्छिन्द्र क्लबपाखें नविन शाक्य, कुमारी छेँपाखें गौतम मानन्धर, क्षेत्रपाटी क्लबपाखें सत्यनारायण डंगोल, भोटाहिति बजारपाखें ज्ञानेन्द्र तुलाधर, श्री भैरवपाखें विश्व शाक्य, श्री गणेशपाखें विश्वप्रकाश शाक्यया लिसें ३० म्ह दुजःत च्वंगु दु ।
