बुंगया गुंला
लछियंकं न्ह्याना च्वंगु गुंला पर्व म्हिगः निसें क्वचाल। थ्व झ्वलय् गुंलाया अन्तिम न्हि कुन्हु बुंगय् जुइगु परम्परागत पौभाः ब्वयेगु ज्या नं म्हिगः क्वचाःगु दु।
गुंला पर्वयात बुंगय् बिस्कं हनीगु परम्परा दु। अन गुंला लछियंकं काहाः पुयाः, तुतः ब्वनाः बुंगद्यः चाःहिलेगु, लछियंकं अपसं च्वनाः लखचैत्य थायेगु, दाफा थायेगु ज्या जुइ। गुंलाया अन्तिम न्हि कुन्हु पौभाः ब्वयेगु ज्या जुइसा स्वन्हु लिपा उगु पौभाः नं लिकाइ। बौया ख्वाः स्वयेगु न्हिकुन्हु बुंगद्यःया देगलय् बुंगद्यःया बाखंनाप स्वाःगु सिहलसार्थबाहया बाखं, महामञ्जुश्री, सुकुन्द देवपुत्र, स्वयम्भू पुराण लगायतया बाखं दुथ्याःगु च्यापाः पौभाः ब्वइगु खः ।
थ्वहे गुंला पर्वया झ्वलय् म्हीग येँ, किपू, पांगा, नगां, मच्छेगां, फम्पिया दाफा खलःत पूजा सहित वःगु खः। उगु दाफा खलः भ्वय् नयाः लछियंकं यानागु सेवा क्वचायेकीगु खः। अथे हे छन्हु छन्हु यानाः यल व ख्वपया दाफा खलःत नं वयेमाः। अथे दाफा खलःत वइ कुन्हु स्वन्हुयंकं हे बुंगया कुमारी नं बाहालय् बिज्याकेमाःगु चलन दु। वंगु विहीवाः स्वीनिम्ह पानेजुपिंत पञ्चदान नं बिउगु खः ।
