रमापतिराजयात नेवाः हना सिरपाः
सक्व (सन्ध्या टाइम्स)/भाषा साहित्य मुँज्या खलःपाखें दँय्दसं बिया वयाच्वंगु 'नेवाः हना सिरपाः सक्व' भाषाथुवाः रमापतिराज शर्मायात लःल्हात। सक्वया फ्रेण्डस् अफ साँखुया हलय् छगू ज्याझ्वःया दथुइ मूपाहां प्रा. डा. तेजरत्न कसाकारं उगु सिरपाः लःल्हानादीगु खः। सिरपाः नीद्वः तकाया खः ।
नेपालभाषा व्याकरण व भाषा विज्ञानया लागाय् ताः ईनिसें यानादीगु योगदानया कदर यासें वय्कःयात उगु सिरपाः लःल्हाःगु खः। सिरपाः लःल्हासें मूपाहां प्रा.डा. तेजरत्न कंसाकारं भाषा विज्ञान व शब्द विज्ञानयात बांलाक अध्ययन याइपिं मदयाच्वंगुलिं झीगु भाषा आः तकं गुगु भाषा पुचलय् दुथ्याः धकाः तकं तिफ्याये मफयाच्वंगु खँ कनादिल ।
सम्मानित व्यक्तित्व रमापतिराज शर्मां नेपालभाषाया तपस्वीतय्सं हे झीगु भाषायात थन तक थ्यंकातःगु खः धासें थः मदये धुंकाःलि नं भाषाया अनुसन्धान न्ह्याना हे च्वनेमाः धइगु थःगु मान्यता दुगु खँ कनादिल ।
ज्याझ्वलय् नेपालभाषा मंकाः खलःया नायः पद्मरत्न तुलाधरं नेपालभाषा साहित्यया इतिहास तसकं तब्या तर झी व्यवहारय् थःपिनि भाषा प्रयोग यायेत तसकं हे कन्जुस जुजुं वनाच्वंगुलिं संरक्षणया दृष्टिं भाषा तसकं खतरनाक अवस्थाय् थ्यनाच्वंगु दु धयादिल ।
प्रा. माणिकलाल श्रेष्ठं नेवाःतय्सं गबलें हे दासता स्वीकार याःगु इतिहास मदु धासे झी पुर्खांनिसें दासता विरुद्ध ल्वायेगु संस्कार झीत स्यना वंगुलिं झीसं उकियात निरन्तरता बीमाःगु खँय् बः बियादिल ।
उगु हे ज्याझ्वलय् जनकवि दुर्गालाल श्रेष्ठं मय्जु श्रीलक्ष्मी श्रेष्ठं च्वयादीगु 'शान्तिया शान्ति' कविता मुना व बाखं च्वमि लक्ष्मण राजवंशीं श्रीलक्ष्मीया हे अंग्रेजीं अनूदित बाखं मुना 'ए क्राइ इन द वाइल्डरनेश एण्ड अडर स्टोरिज' बिमोचन यानादीगु खः। नेवाः भासं पिहां वयेधुंकूगु उगु सफू डा. तेजरत्न कंसाका व केशरलाल श्रेष्ठं अंग्रेजीं अनुवाद यानादीगु खः ।
राजदास श्रेष्ठया सभापतित्वय् जूगु उगु ज्याझ्वलय् डा. बालगोपाल श्रेष्ठ, डा. महेशमान श्रेष्ठ व कवि पूर्ण बैद्यपिंसं नेपालभाषा संरक्षणया विषयय् न्ववानादीगु खः ।
