उपप्रधानमन्त्री खुम्ह दावेदार
येँ (सन्ध्या टाइम्स)/प्रधानमन्त्री डा. बाबुराम भट्टराईया नेतृत्वय् दयेकूगु सरकारयात पूर्णता बीगु नितिं मेपिं खुम्हेस्यां उपप्रधानमन्त्रीया दावी याना हःगु दु ।
एकीकृत माओवादीया उपाध्यक्ष नारायणकाजी श्रेष्ठ, सचिव पोष्ट बहादुर बोगटी व सीपी गजुरेलं उपप्रधानमन्त्री दावी यानादीगु दु। वय्कःपिंसं यदि थःपिं उपप्रधानमन्त्री मजुइगु खःसा सरकारय् वनेगु जुइ मखु धकाः ख्याच्वः बियाच्वंगु दु ।
अथे हे मधेसी मोर्चाय् दुथ्याःगु न्यागू दल मध्ये मधेसी जनअधिकार फोरम गणतान्त्रिक व तराई मधेस लोकतान्त्रिक पार्टीपाखें नं उपप्रधानमन्त्रीया दावी याःगु दु।
अथे हे मोर्चाय् दुमथ्याःगु मधेसी जनअधिकार फोरमपाखें नं उपप्रधान मन्त्री हे दावी याःगु दु ।
उपप्रधानमन्त्री बीगु जुल धाःसा जक थः सरकारय् वयेगु जुइ, मखुसा पार्टीपाखें मेपिं हे छ्वया हयेगु जुइ धकाः फोरमया अध्यक्ष उपेन्द्र यादवं धायेधुंकूगु दु। मधेसी जनअधिकार फोरम (लोकतान्त्रिक)या अध्यक्ष विजय गच्छेदार उपप्रधान नापं गृहमन्त्री जुइ हे धुंकूगु दु। दावी याःपिं फुकसित उपप्रधानमन्त्री बीगु खःसा सरकारय् उपप्रधानमन्त्रीतय् ल्याः खुम्ह थ्यनीगु जुयाच्वंगु दु।
उपप्रधानमन्त्रीया दावेदारत यक्व दुसां यक्व उपप्रधानमन्त्री दत धाःसा जनतां बांलाः कथं काइ मखु धासें प्रधानमन्त्री भट्टराईनं धाःसा छम्ह जक उपप्रधानमन्त्री यायेगु जुइ धकाः अडान कया वयाच्वंगु दु। उपप्रधानमन्त्री जुइपिं यक्व दयाः हे मन्त्रीमण्डल विस्तार याये मफयाच्वंगु खँ माओवादीया छम्ह वरिष्ठ नेतां धयादीगु दु ।
प्रमपाखें स्वंगू दलया बैठक आह्वान
प्रधानमन्त्री डा. बाबुराम भट्टराईनं थौं स्वंगू दलया शीर्ष नेतातय्गु मंकाः बैठक आह्वान यानादीगु दु। शान्ति प्रक्रिया न्ह्याकेगु नितिं माःगु सहलह यायेत नापं सरकार संचालनया विषययात कयाः सहलह ब्याकेत वय्कलं एकीकृत माओवादी, नेपाली कांग्रेस व नेकपा एमालेया शीर्ष नेतातय्तगु मंकाः बैठक सःतादीगु खः। थौं न्हिनय् १ बजे सिंहदरवारया थःगु हे ज्याकुथी सःतूगु उगु बैठक लिपा जक सेना समायोजन विशेष समितिया बैठक ३ बजे च्वनाः माओवादी लडाकुया पुनवर्गीकरण सम्बन्धी ज्या न्ह्याकेगु जुइ धाःगु दु ।
