कांग्रेसया लिसः हे एमालेया नं लिसः
येँ (सन्ध्या टाइम्स)/नेपाली कांग्रेसया सभापति सुशील कोइरालां प्रधानमन्त्री डा. बाबुराम भट्टराईयात गुगु कथं लिसः बिउगु खः उगु हे कथं एमालें नं यथास्थितिइ सरकारय् वयेगु जुइ मखु धकाः लिसः बियाहःगु दु ।
प्रधानमन्त्री डा. बाबुराम भट्टराईनं थौं पुलांम्ह प्रधानमन्त्री नापं एमाले अध्यक्ष झलनाथ खनालयात नापलानाः सरकारय् दुहां वयेत इनाप याःबलय् अध्यक्ष खनालं उकथं लिसः बियादीगु खः। थौं सुथय् प्रधानमन्त्री भट्टराई खनाल निवास डल्लुइ वनाः खँल्हाबल्हा यानादीगु खः ।
उगु इलय् वर्तमान सरकार बहुमतीय सरकार जूसां थुकियात सहमतीय सरकारया रुपय् यंकेत थम्हं कुतः यानाच्वनागु दु धासें प्रम भट्टराईनं सरकारय् वयेत इनाप यानादीगु खः। वय्कलं शान्ति व संविधानया निंतिं ग्वाहालि यायेमाल धकाः नं इनाप यानादीगु खःसा लिसलय् अध्यक्ष खनालं उकिया नितिं सकारात्मक भूमिका म्हितेगु जुइ धयादीगु खः। खँल्हाबल्हा लिपा एमाले अध्यक्ष खनालं संचारकर्मीतलिसे खँल्हासें धयादिल 'छु पृष्ठभूमिइ सरकारया निर्माण जूगु खः व अवस्थाय् थुकियात सहमतीय सरकारय् हिले फइ मखु। तर राष्ट्रिय मुद्दातय्गु विषयय् फुक्क छगू हे थासय् वये फत धाःसा उकियात इन्कार यायेगु जुइ मखु। थ्व स्वलाया ई तसकं महत्वपुर्ण जू ।'
प्रम भट्टराई थौंकन्हय् राजनीतिक दलतय्त नापलानाः सहलह ब्याकेगुली ब्यस्त जुयादीगु दु। वय्कलं म्हिगः जक नेपाली कांग्रेसया सभापति सुशील कोइरालायात छेँय् हे वनाः नापलानादीगु खःसा थौं संविधानसभाय् दुथ्याःगु मेमेगु दलया नेतातय्त नं नापलान सहलह ब्याकादीगु ज्याझ्वः दु। फुक्कं दलत वय्कःया ज्या निं स्वयेत इच्छुक जुयाच्वंगु खनेदु ।
