प्रधानमन्त्री सवार नेपाली गाडी
डा. बाबुराम भट्टराईं छम्ह प्रधानमन्त्रीया रुपय् नेपालय् हे तयार याःगु मुस्ताङ गाडी गयादीगुलिं प्यखेरं वय्कःया तारिफ सुरु जूगु दु। थुकिं प्रम भट्टराईया 'ओपनिङ' सकारात्मक जूगु संकेत याः। वय्कः देशया लागिं छुं याइम्ह खः धकाः जनतां यानाच्वंगु आशायात थुकिं बः बिउगु दु। लिसें प्रधानमन्त्री वा मन्त्री जक जूसां थःगु लागिं करोडौं तूगु विदेशी गाडी झिके यानाः राजसी पहः क्यनीपिं पुलांपिं मन्त्रीत थ्व इलय् लज्जित (यदि लज्जा दुसा) जुयाच्वंगु दयेमाः ।
भारतय् नं प्रधानमन्त्रीनिसें मन्त्रीतय्सं तकं भारतय् हे तयार जुइगु एम्बेसडर गाडी गयाः मित्व्ययिता व राष्ट्रियताया म्हसीका बीगु खः। भारतया उगु सकारात्मक ज्यायात प्रम भट्टराईनं अनुशरण याःगु बांलाः जू।
प्रम भट्टराईनं आः थम्हं जक मखु थःगु मन्त्रिमण्डलया मेपिं मन्त्रीतय्त नं नेपाली गाडी हे छ्यले बीकेगुपाखे आः पलाः न्ह्याकेमाः। अझ जिउसा वय्कलं थः धुंकाःया प्रधानमन्त्रीतय्सं नं नेपाली गाडी प्रयोग यायेमाः धकाः निर्णय हे याना थकल धाःसा उकिं आः वइपिं प्रधानमन्त्रीतय्त नं लँपु क्यनी। कम से कम नं देय्या सरकारी पदाधिकारीतय्सं स्वदेशी उत्पादनया प्रयोग सुरु यात धाःसा उकिं राष्ट्रियता जक मखु देय्या आर्थिक उन्नतियात नं तिबः बी। गाडी जक मखु मेमेगु हलंज्वलंया प्रयोगय् नं स्वदेशी उत्पादनयात हे बः बीगुपाखे न्हूम्ह सरकारया कुतः जुइमाः। डा. भट्टराई छम्ह अर्थविद् नं जूगु कारणं सरकारपाखें याइगु थज्याःगु ज्याया आर्थिक प्रभाव गुलि तक दइ धइगु खँ वय्कलं बांलाक हे सिउ जुइमाः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
