मतिना

अनिक शाक्य

छंगु जिगु मतिना
अहो ! गज्याःगु खः थ्व मतिना ?
न छ जिगु न्ह्यःनय् दु
न जि छंगु न्ह्यःनय् दु
न छं दः थ्यूगु दु
न जिं छन्त थियाःगु दु
अय्नं लुमुस्य च्वं थ्व मतिना
सिचुस्य च्वं थ्व मतिना
माकुस्य च्वं थ्व मतिना
अहो ! गज्याःगु खः थ्व मतिना ?

जिं थ्व कविता छंगु निंतिं
च्वयाच्वनाःगु मखु
छं जिगु निंतिं थ्व
ब्वनाच्वंगु नं मखु
तर नं जिं च्वयाः हे च्वनाः
छं नं ब्वनाच्वन जुइ
जिं छाय् च्वयाः ?
छं छाय् ब्वन ??
न जिं स्यू, न छं सिल !
सायद थ्व नं खः मतिना !
अहो ! गज्याःगु खः थ्व मतिना ?

निस्वार्थी मतिना
र्स्पर्श विहिन मतिना
पवित्र मतिना
छंगु जिगु थ्व मतिना
नसंचाय् सर्गतं
कुतुवःगु सुतिलः थें
द्यः व पुजारिया आस्था थें
नुगः व भावनाया स्वापू थें
अदृश्य मतिना
अहो ! गज्याःगु खः थ्व मतिना ?

थ्व मतिना दयाः
जि अत्ति लय्ताः
तर थ्व मतिना दः
छं गुबले बिल ?
व छं मस्यू
जिं गुबले कयाः ?
जिं नं वाःमचाः
तर सवा काय् धुन
जिं थ्व मतिना,
अमूल्यगु मतिना
न्याय् म्वाःगु मतिना
अहो ! गज्याःगु खः थ्व मतिना ?

More Stories Like this