बांलाःगु ज्या यायां हे आलोचना

पुष्पलालयात श्रद्धांजलि प्वंकूगु खँय् गैर वामत रुष्ट

येँ (सन्ध्या टाइम्स)/नवनियुक्त प्रधानमन्त्री डा. बाबुराम भट्टराई पदय् वयेवं हे देय्न्यंकं आशाया सञ्चार जूगु दुसा उकिया नापनापं प्रम जूगु निन्हु मदुनिवं वय्कलं यानादीगु छुं छुं ज्या आलोचनाया विषय नं जूगु दु ।

दकलय् न्हापां ला वय्कलं प्रधानमन्त्री जुइसातकि देय्या सहिद स्मारकय् वनाः श्रद्धांजलि प्वंकीगु परम्परायात त्वाःथलाः कम्युनिष्ट पार्टीया संस्थापक महासचिव पुष्पलाल श्रेष्ठया झ्वाताय् श्रद्धांजलि प्वंकादीगु ज्या हे आलोचित जूगु दु। वय्कः आः सम्पूर्ण देय्या हे प्रधानमन्त्री जुयादीधुंकूगु कारणं वय्कलं गुगुं छगू जक पार्टीया नेताया झ्वाताय् श्रद्धांजलि देछात धकाः गैरकम्युनिष्ट मनूत रुष्ट जूगु दु। यदि थथे हे जुया वन धाःसा कन्हय् कांग्रेसया प्रधानमन्त्रीं वीपी कोइरालायात व मधेसवादी प्रधानमन्त्रीं गजेन्द्रनारायणयात राजकीय श्रद्धांजलि प्वंकेगु चलन सुरु जुइफु धइगु तर्क उमिसं तयाहःगु दु ।

लिसें म्हिगः चम्पादेवीइ पुष्पलाल श्रेष्ठया झ्वाताय् श्रद्धांजलि प्वंकेगु ज्या नं प्रम भट्टराईनं प्रक्रिया मसिउगु कारणं भद्रगोल जूवन। प्रधानमन्त्री जुइसातकि श्रद्धांजलि प्वंकेगु थ्व ज्या तसकं औपचारिक जुइ। उकी सेनां धुन हायेकाः स्वां देछायेगु व स्वां देछायेधुंकाः छगू मिनेट मौन धारण समेत यायेमाःगु खः। तर म्हिगः प्रम भट्टराई वयेसातकि पुष्पलालया झ्वाताय् थ्यनेवं लाल सलाम यानाः धुन हायेकाच्वंक च्वंक हे चाःहिलाः लिहां वनेत्यंगुलिं एडीसी ब्वाँय् वनाः पं वनेमाःगु अवस्था वःगु खः। प्रमया उगु ज्या खनाः धुन हायेकः वःपिं सैनिकत नं अक्कबक्क जूगु खः ।

उखे मधेसवादी दलतलिसे जूगु प्यंगू बुँदे सम्झौताय् माओवादी युद्धकाल व मधेसवादी आन्दोलनय् समेत पीडित जूपिंत राहत बीगु व आन्देलनकारीतय्सं याःगु फुक्क ज्यायात माफी बियाः उमिगु मुद्दा समेत लित कायेगु धकाः याःगु सहमतियात आन्दोलनकारीपाखें पीडित पक्षं आलोचना याःगु दु। आन्दोलनकारीतय् कारणं पीडित जूपिंसं चायेकातःगु गुलिखे संस्थातय्सं उगु सहमतियात विरोध यासें थुकिं यानाः देशय् दण्डहिनता अझ अप्वइगु ख्याच्वः बिउगु दु। थौं बेपत्ता सम्बन्धी अन्तर्राष्ट्रिय दिवस कुन्हु उमिसं थ्व पक्षयात ल्ह्वनेत्यंगु खँ सीदुगु दु ।

प्रम भट्टराईं थौं कर्मचारी व सुरक्षा निकायया प्रमुखतलिसे अलग अलग भेट यानादीगु दु ।