प्रमपाखें उच्चस्तरीय राजनीतिक संयन्त्रया प्रस्ताव
येँ (सन्ध्या टाइम्स)/प्रधानमन्त्री डा. बाबुराम भट्टराईनं नेपाली कांग्रेसया सभापति सुशील कोइरालायात शान्ति प्रक्रिया व संविधान निर्माण नापं मेमेगु विषयया समस्या समाधान यायेगु नितिं उच्चस्तरीय राजीतिक संयन्त्र दयेकेगु प्रस्ताव तयादीगु दु ।
उगु संयन्त्रय् मूमू राजनीतिक दलया शीर्ष नेतात दुथ्याइ। थौं सुथय् कोइराला निवास महाराजगञ्ज वनाः नापलायेगु झ्वलय् प्रम भट्टराईनं उगु प्रस्ताव तयादीगु खः। सभापति कोइरालां उगु प्रस्तावयात सकारात्मक रुपं काःगु खँ सूत्रं धाःगु दु। कोइरालाया धापू उद्घृत यासें सूत्रं धाः कथं वय्कलं 'छिगू प्रस्ताव सकारात्मक जू, सहलह यानाः सहमतिइ वने फइ' धकाः लिसः बियादीगु खः ।
बाघौ तक जूगु खँल्हाबल्हाय् प्रधानमन्त्रीं राष्ट्रिय सहमति बिना समस्या समाधान याये मफइगु, संविधान निर्माण याये मफइगु नापं शान्ति प्रक्रिया तकं पूवंके मफइगु जुयाः थःगु नेतृत्वया सरकारयात राष्ट्रिय सरकारया स्वरुप बीगु निंतिं ग्वाहालि यायेत इनाप यानादीगु खः ।
कांग्रेसया सभापति कोइरालां धाःसा यथास्थितिइ थःपिं सरकारय् वये फइगु अवस्था मदु धकाः लिसः बियादीगु खः। आः माओवादीं शान्ति प्रक्रिया पूवंकल धाःसा थःपिंसं बिचाः यायेगु जुइ धयादिसें वय्कलं प्रधानमन्त्रीइ निर्वाचित जूगुलिं डा. बाबुराम भट्टराईयात भिंतुना बियादिल ।
प्रधानमन्त्री डा. बाबुराम भट्टराई सपथ ग्रहण यानादीधुंकाः न्हापांखुसी हे प्रमुख प्रतिपक्षी दल कांग्रेसया सभापति कोइरालाया छेँय् वनाः खँल्हाबल्हा यानादीगु खः। प्रम भट्टराईं थ्वहे प्रस्ताव मेमेगु दलया नेतातय् न्ह्यःने नं तयादीगु खँ धाःगु दु। वय्कलं फुक्कं दलतलिसे सहलह ब्याकेगु ग्वसाः दयेकादीगु दु ।
