माओवादी दुने उपप्रधानमन्त्रीया विवाद

येँ (सन्ध्या टाइम्स)/मन्त्री मण्डलय् सु सु छ्वयेगु धइगु खँ क्वःछीत थौं माओवादी स्थायी समितिया बैठक च्वनीगु जूगु दु। सनिलय् पार्टी केन्द्रीय ज्याकू पेरिसडाँडाय् च्वनीगु उगु बैठकय् सरकार संचालनया निंतिं माःगु रणनीति, शान्ति प्रक्रिया, संविधान निर्माण नापं प्रधानमन्त्री डा. बाबुराम भट्टराईं देशवासीया नामय् यानादीगु संवोधन भाषणयात कयाः सहलह जुइ धाःगु दु। एकीकृत माओवादी दुने स्वंगू लाइन दुगु अवस्थाय् आः वरियताक्रमया ल्याखं उपप्रधान मन्त्री सुयात यायेगु धइगु विषयय् विवाद जुयाच्वंगु खँ सीदुगु दु। पार्टी अध्यक्ष प्रचण्ड पक्षधर व उपाध्यक्ष मोहन बैद्य किरण पक्षधर नेतातय्सं थःथःपिनि हे मनूयात उपप्रधानमन्त्री यायेमाः धकाः दावी यानाच्वंगु दु। थ्वहे दथुइ सरकारयात पूर्णता बीगु विषययात कयाः मधेसी मोर्चालिसे नं माओवादी नेतातय्सं वार्ता याइगु जूगु दु ।