स्वयम्भुया धार्मिक वनय् नेपाःया मौलिक सिमा पीगु ज्या

येँ (सन्ध्या टाइम्स)/स्वयम्भूया धार्मिक वनय् नेपाःया मौलिक वनस्पतित पीगु ताः तयाः जापानया नेशनल ल्याण्ड एफोरेष्टेशन प्रमोशन अर्गनाइजेशन (नालापो), नेपाल वातावरणीय तथा शैक्षिक केन्द्र (सेनिड), स्वयम्भू व्यवस्थापन व संरक्षण महासमितिया मंकाः ग्वसालय् वंगु शनिवाः सिमा पीगु ज्या जुल। महासमितिया अध्यक्ष सर्वज्ञरत्न तुलाधर व जापानं वःम्ह प्राध्यापक डा. सोजो शिवातां मंकाः कथं उलेज्या यानादीगु उगु सिमा पीगु ज्याय् जापानं वःपिं मेपिं नं आपालं पाहांपिंसं ब्वति काःगु खः। वय्कःपिंसं स्वयम्भुया जंगलय् नेपाःया मौलिक वनस्पतित रिठ्ठा, पालिजाः, काउलो, जमाने माद्रो, आम्लि, बेल, पुवाँले, सिलिङ्गे, घगाँरु, रुद्राक्ष थेंज्याःगु धार्मिक व आयुर्वेदिक ल्याखं महत्वपूर्ण सिमा पिउगु खः। ज्याझ्वलय् ब्वति कयादीम्ह जापानया प्रा.डा. शिवाता स्वयम्भूया क्यब निर्माणया झ्वलय् २२ क्वः नेपाः झायेधुंकूम्ह खः। ज्याझ्वः स्वन्हु तक जूगु खः ।