संविधानसभा म्याद थपया विकल्प मदु

देशय् न्हूम्ह सरकार वयेसातकि दकलय् न्हापां हे संविधानसभाया म्याद थपे यायेगु ज्या निं न्ह्यःने वःगु दु। तर संविधानसभाया म्याद गुलि थपे यायेगु धइगु खँय् दलतय् दथुइ हे विवाद दुगुलिं न्हूम्ह प्रधानमन्त्री डा. बाबुराम भट्टराईनं चाहे जू थें खुला म्याद थपे यायेत धाःसा अःपुइगु खने मदु। खास यानाः नेपाली कांग्रेस व नेकपा (एमाले) निगुलिं पार्टी आः संविधानसभाया म्याद ताःहाकः याये मजिउ धइगु पक्षय् दुगुलिं प्रम भट्टराईनं प्रस्तावित यानादी थें खुला म्याद थपे यायेत समस्या वयेफुगु खनेदु। थुकिया लागिं वय्कलं शान्ति व संविधान थुकथं पूवनी धइगु स्पष्ट रोडम्याप न्ह्यःने तयाः उकिया नेतातय् सहमति काये माःगु आवश्यक जुइ ।

थुकिया नापनापं म्याद थपया ज्यायात सर्वोच्च अदालतं यानातःगु फैसलां नं पना बीगु अनुमान जुयाच्वंगु दु। सर्वोच्चपाखें संविधानसभाया म्याद खुलां अप्वः थपे याये मजिउ धकाः फैसला यानातःगु दु। थ्व खँय् स्वय्म राष्ट्रपति डा. रामवरण यादवं नं दलतय्त सचेत यानादीगु दु। तर अथे खयां नं म्याद थपे याःगु पाय्छि मजुल धकाः थीथी मनूतय्सं तःगु रिटयात धाःसा वहे सर्वोच्चं �आवश्यकताया सिद्धान्त� कथं धकाः खारेज नं यानाच्वंगु दु। उकिं आः जुइगु म्याद थपया कानुनी हैसियत नं व स्वयां अप्वः मजुइगु खँय् शंका मदु। थुकिं सरकार लगायत मेमेगु राजनीतिक दलतय्त नं संविधानसभाया म्याद मेगु खुला थपे यायेत बल हे बी धकाः अनुमान यायेछिं। ज्या थुलि ल्यं दनि कि स्वलां उकियात पूवंके फइ मखु धकाः सकस्यां सिउ। थज्याःगु अवस्थाय् संविधानसभा भंग यायेगु दिशापाखे सुं मवनीगु नं निश्चित हे खः ।

More Stories Like this