थुइकीम्ह सु?

नर्मदेश्वर प्रधान

खँयाखँय्

टिभि। पुलां जुइ। न्यानाबलय् बांलाः। नांजाःगु कम्पनीया। नीदँ दत। नीदँ तक ज्या बी। थौंतक बिया हे च्वन। समाचार न्यने। स्वये। मेमेगु उगुंथुगुं कार्यक्रमत मस्वया। उलि स्वये मयः। सिरियलत ला गबलें मस्वया। समाचार अन्तर्वार्ता कार्यक्रम स्वये। न्यने। उलियात टिभिं ज्या बिउ। बांलाक ज्या याः। छुं स्यंगु मदुनि। स्वयेबलय् भचा पुलां खने दइ। थौंकन्हय् नाना डिजाइनया टिभि वइ। पतिचिंगु, सालुगु टिभि खने दइ। जिगु पुलांगु टिभि। तग्वः। थौंकन्हय्या टिभिया न्ह्यःने भद्दा। तर जितः वहे टिभि यः। ज्या बियाच्वंगु दु। मययेके माःगु कारण छुं मदु। खः भचा पुलां खने दइ। पुलां खने दतं छु जुल? ज्या बिया हे च्वन। थ्वयात हिलेमाःगु छाय्?

उखुन्हु। टिभिया सः भचा घ्यारघ्यार जुइ। सेखं चाः थें। "छकः क्यने दुसा जिउ। तःधंगु ल्वय् ला मखु थें च्वं। मर्मत केन्द्रय् यंकेमाली।" मस्तय्त धाये। तर अःखः। मस्तय्सं जितः नागःतुगः याइ। पुलां जुइधुंकल। दयेकां गन जी। वांछ्वया बीगु का व। पुलांगु टिभि नं मर्मत यानां हायेकी ला? न्हूगु हे न्यायेगु का। बजारय् गुलि बांबांलाःगु वयाच्वंगु दु। न्हून्हूगु डिजाइनया। थुज्वःगु पुलांगु टिभि हायेके मछाःसे च्वं। मस्तय् लिसः वइ। "वांछ्या बिउ, न्हूगु न्यायेगु का।" मस्तय् सुझाव। न्यने। कपाः स्याना वइ। थौंकन्हय् टिभिया बारे खँ मल्हायेधुन। समाचार न्यने। ज्या काये। भचा घ्यारघ्यार सः वइ। बिचाः याये। थ्व छुं तःधंगु समस्या मखु। टिभिया खँ ल्हाये। जहान परिवार फुक्कसियां छप्वाः म्हुतु जुइ। पुलां जुल। वांछ्वःसां जिल। न्हूगु छगः माल। दबाब वइ। जिं मताःछु याये। मतिं धाये "जिगु टिभिं ज्या बिया हे च्वंगु दु। छाय् हिले?"

जितः सुयागुं खं थी मखु। ज्या बिया हे च्वन। छाय् वांछ्वये? न्हूगु माःगु छाय्? पुलांगु न्हूगुया खँ मखु। ज्या बित्तले न्हूगु हे जुइ। ज्या मबिउसा न्हूगु जुयां जक जी ला? तर थौंकन्हय् जमाना पाइ। ज्या बिउ, मबिउया खँ छखे लाइ। न्हूगु माः। हिलेमाः। सौंख जुइ। "बाज्याया मोबाइल ला झुर। न्हूगु न्याये माल। थौंकन्हय् गुज्वःगुज्वःगु मोबाइल वये धुंकल......" छय्पिंसं धाइ। ख नं खः। थौंकन्हय् खँ ल्हानां मब्याः। न्हून्हू कथंया मोबाइल। अनेक कथंया ज्या बीगु। तर जितः धाःसा थुखेर उलि आर्कषण मदु। छगः साधारण मोबाइल घाना जुइ। ज्या काये। उलि ज्या नं कायेम्वाः। साधारण जुलं छु जुल ! ज्या काये। म्ह्याय्पिंसं धाइ, "बाया मोबाइल मजिल। हिले माल। स्वये हे मछालापुसे च्वन। थौंकन्हय् गुलि बांबांलाःगु मोबाइलत दु बजारय्......। अज्याःगु मस्तय्सं मथीगु मोबाइल घाना जुइगु ला? वांछ्वये माल आम मोबाइल।" ख नं खः। थौंकन्हय् मस्तय्सं मोबाइलया भाय् गुलि थू। जिं उलि मथू। मस्तय्सं मोबाइल अःपुक छ्यली। जिं सिउ। जितः साधारणगु दःसां गाः। ज्या बी। अनेक सुविधा दुगु मोबाइल छु यायेत? छ्यले नं सइ मखु। ज्या काये फइ मखु। कपाः जक स्याकाच्वने माली। जिं सिउ जिगु मोबाइल साधारण। उलि थीकेगु मखु। तर ज्या बिउ। बिया हे च्वन। जिं ज्या कयाच्वनागु हे दु। मती लुइ। छाय् हिले? छाय् वांछ्वये? मचाय्क जिगु अहम् भाव दनावइ। "तसकं हे नुगः स्याःम्ह का। भ्वाथःगु मोबाइल घाना जुइ। बांलाःगु मोबाइल छगः न्याये मफुम्ह ला मखु नि......" जिगु मोबाइल खनाः थथे टिप्पणी याइपिं नं दु। जिं सिउ। तर जिगु मोबाइलं ज्या बिउ। जिं ज्या कयाच्वने। जितः गर्वबोध जुइ। जिं सुयागुं टिप्पणीयात चिउताः मतया।
"पाजु ! कम्प्यूटरया मोडल पुलां जुइधुंकल। थौंकन्हय् न्हून्हूगु मोडल वयेधुंकल। अनेक सुविधा दु थौंकन्हय्या कम्प्यूटरय्। छगः न्हूगु न्यानादी माल।" भिन्चिया खँ न्यने। वं धाःगु खः। जिगु कम्प्यूटर भचा पुलां जुइकल। तर थ्वं ज्या बियाच्वंगु दु। जितः माःगु सुविधा थ्वं बिउ। टाइप याये जिउ। इन्टरनेट स्वये जिउ। स्पीड भचा म्हो। उलि ज्या कायेमाःगु नं मखु। भिन्चिया खँ न्यने, नुगः गर्खेसे च्वनी। धात्थें पुलां जुल ला थ्व कम्प्यूटर? मछाःसे च्वना वइ। भिन्चित धाये, "का मिया बिउ ले थ्व, भचा भचा ध्यबा तने। न्हूगु न्याये।" जिगु खँ न्यनी। भिन्चा न्हिली। प्वाःतितिउँ न्हिली। "छु धयादिया पाजु? सुनां न्याइ थ्व कम्प्यूटर? सितिं बिउसां काइपिं दइ मखु। कवाडीयात बिया छ्वयेगु का थ्व.....।" भिन्चिया खँ न्यने। जि अवाक्। छुं धाये फइ मखु। कम्प्यूटरं ज्या बियाच्वंगु दु। जिं ज्या कयाच्वनागु दु। पुलां जुयां छु याये। छु जुल? ज्या बिउ। तर भिन्चां धाइ, "थ्व कम्प्यूटरया मू शून्य जुइ। वांछ्वःसां जी धुंकल।" भिन्चिया खँ न्यने। मनं मनं हीमी चाये। ज्या बिउनि। जिं छाय् वांछ्वये? वांछ्वये मखु। वांछ्वये मते। नुगःया गनं कुनं जितः हःपाः बियाच्वंगु दु। अनुभव जुइ ।

पुलां जुल.....। वांछ्वःसां जिल....। ज्या बियां जी ला? स्वये हे मजीधुंकल..। मछालापुसे च्वनेधुंकल। हिले माल। थौंकन्हय् थ्व नवीन संस्कृति प्यखेरं खने दइ। थ्वं जितः गबलें ह्ययेकी। गबलें नागःतुगः याइ। गबलें हिस्याइ। जि विस्मित जुइ। छुं धाये फइ मखु। ज्या बिउगु वस्तुतपाखें ज्या काये। मन तये। सन्तोष जुइ। मनं धाइ। थ्व जिगु कमजोरी मखु। तर आश्चर्य ! इलं छाय् दः हिस्याइ? ध्वां खंकी। मूर्ख तायेकी। ज्या बिउगु टिभि वांछ्वये। ध्यबा फुके। न्हूगु न्याये। जि आधुनिक जुइ। ज्या बिउगु मोबाइल वांछ्वये। थिकेगु न्याये। जि बुद्धिमान जुइ। ज्या तरे यानाच्वंगु कम्प्यूटर कवाडीयात बियाछ्वये। जि ई थूम्ह जुइ ।

छुं मजूगु लाकां। न्ह्याये जिउगु पाइन्ट। फी जिउगु कमिज। मस्तय्सं सुचुका बी। वइतं थ्वइतं बिया छ्वइ। धाइ अति पुलां जुल। लाकांत न्ह्याये जिउनि। कमिज, पाइन्ट तःदँ न्ह्यःया। तर छुं मजूनि। फी जिउनी। न्ह्याये जिउनी। लुमनां च्वनी। जिगु विवेकं धयाच्वनी। इपिं छुं मजूनि। फी जिउनि। न्ह्यसः न्हूगु लाकां, न्हूगु पाइन्ट, कमिजया मखु। न्ह्यसः जुइ न्ह्याये जिउगु लाकां गय् पुलां जुइ? फी जिउगु कमिज, न्ह्याये जिउगु पाइन्ट गय् पुलां जुइ? न्हूगु लाकां दइ। न्हूगु कमिज, पाइन्ट खनी। छाय् थें जितः गर्वबोध जुइ मखु। इमित स्वये। गनं जि तनाच्वंगु अनुभव जुइ ।

ज्या बिउ मबिउया खँ मखु। न्हून्हूगु न्या। न्हून्हूगु छ्य। थौंया न्हूगु संस्कृतिया माग जुइ। थौंया प्रविधिं थ्व हे धाइ। तर वास्तविक खँ थन संस्कृतिया मखु। प्रविधिया मखु। विश्व पूँजीवादी आर्थिक प्रणालीया जुइ। संस्कृति व प्रविधियात विश्व आर्थिक पूँजीवादं थौं शोषणया माध्यमकथं छ्यली। वांछ्वया बिउ। न्हूगु छ्य। न्हून्हूगु प्रविधिपाखें ज्या का। थौंया मनूतय् म्हुतुइ घाना थें जुइ। थ्व संस्कृति, संस्कारं थौंया मनू अन्ध जुइ। थ्व मथूपिंत थौंया पुस्तां जंगली खंकी। "ज्या बिउनि। छाय् वांछ्वयेगु?" थ्व बाणी थौं असभ्य खने दइ। तर न्हूगु संस्कृति व संस्कारया नामय् पूँजीवादी, आर्थिक प्रणालीया शिकार गुकथं थौंया मनू जुया वनाच्वन। थ्व थुइकीम्ह सु?

More Stories Like this