गृहमन्त्री जुइत केपीयात इनाप
वामत ल्वाकेगु गिरिजाया दाउ
येँ (सन्ध्या टाइम्स) / एमालेया वरिष्ठ नेता माधव नेपाल प्रधानमन्त्री नियुक्त जुइधुंकाः आः सरकारयात पूर्णता बीगु ज्याय् धाःसा वय्कःयात सामान्य समस्या वइगु खनेदु । वय्कःयात प्रधानमन्त्री दयेकेत दकलय् महत्वपूर्ण भूमिका म्हितूगु पार्टी नेपाली कांग्रेसं उपप्रधानमन्त्री लगायत रक्षा मन्त्री वनाच्वंगु दुसा एमालें रक्षा कांग्रेसयात हे बीगु निश्चित जुइधुंकूगु दु । रक्षा कांग्रेस-यात वनीगु जूगुलिं एमालें गृह कायेत स्वयाच्वंगु दु । तर कांग्रेसं धाःसा गृह नं थःत हे माः धइकथंया संकेत छ्वया हःगु खँ सूत्रं धाःगु दु ।
म्हिगः मन्त्रिपरिषद् गठन बारे नेकां सभापति गिरिजाप्रसाद कोइराला व एमाले नेता केपी ओली दथुइ स्वघौ वार्ता जुल । कोइराला निवासय् उगु वार्ता जूगु खः । उकी कोइरालां ओलीयात गृह मन्त्री जुइत इनाप यानादीगु खः । यदि ओली गृह मन्त्री जू वयेगु खःसा गृहय् कांग्रेसया दावी मदइगु खँ नं कोइरालां धयादीगु खः । सूत्रया कथं यदि ओली हे गृह मन्त्री जुल धाःसा माओवादी कार्य- कर्तातय् गतिविधि नियन्त्रण यायेत अःपुइ धइगु कोइरालाया धापू खः ।
छुं जुयाः गृह एमालेयात वइगु जुल तर उकी ओली मवनीगु जुल धाःसा उगु पदय् एमालेया उपाध्यक्ष विद्या भण्डारीयात छ्वयेफुगु खँ नं सूत्रं धाःगु दु ।
एमालेपाखें आः शंकर पोखरेल, सुरेन्द्र पाण्डे, विष्णु पौडेल, रघुवीर महासेठ आदिपिं वनीगु जुयाच्वंगु दु । सूत्रया कथं माओवादी त्वःताः एमालेय् वःम्ह रवीन्द्र श्रेष्ठयात नं मन्त्री दयेकीगु सम्भावना दु ।
संविधानसभा चुनाव न्ह्यः कांग्रेसया नेतृत्वय् गठित अन्तरिम सरकारय् कांग्रेसं रक्षा गृह अर्थ स्थानीय विकास व शान्ति मन्त्रालय काःगु खःसा आः एमालेया नेतॄत्वय् गठित सरकारं नं थुपिं हे मन्त्रालयत थःपिंसं कायेमाः धइगु बिचाः एमाले दुने वयाच्वंगु खँ सूत्रं धाःगु दु ।
प्रधानमन्त्री पदय् नियुक्त जुयादीम्ह भाजु नेपालं राष्ट्रपतिया ल्हातं शपथ धाःसा कंस मंगलवाः जक ग्रहण यानादीगु जूगु दु ।
