म्यानयु, म्यानचेस्टर सिटी व न्यूकासल विजयी

इङलिस प्रिमियर लीग फुटबलया सोमवाः बहनी जूगु कासाय् म्यानचेस्टर युनाइटेड, म्यानचेस्टर सिटी व न्यूकासल युनाइटेडं थःथःगु कासा त्याकूगु दु ।

ओल्ड ट्राफोर्डय् जूगु कासाय् म्यानचेष्टर युनाइटेडं आर्सनलयात तःधंगु अन्तरं बुकेत ताःलाःगु खः । उगु कासाय् युनाइटेडं आर्सनलयात निगूया विरुद्ध च्यागू गोलं बुकूगु खः । कासाय् वायन रोनीं ह्याट्रिक पूवंकूगु खःसा यस्ली योङं निगू लिसे ड्यानी वेलबेक, नानी व पार्क जी सुङं छगू-छगू गोल याःगु खः ।

अथेहे मेगु कासाय् म्यानचेष्टर सिटीं टोटेनह्यामयात छगूया विरुद्ध न्यागू गोलं बुकूगु दु । कासाय् सिटिया एडिन जेको याकःचां हे प्यंगू गोल याःगु खः । जेकों कासाया स्वीप्यंगूगु, पीछगूगु, न्यय्न्यागूगु लिसे कासाया लिपांगु मिनेटय् यानाः प्यंगू गोल याःगु खः । म्यानचेष्टर सिटीया निंतिं थप गोल सर्जियो एगुइरों याःगु खः । उखे टोटेन ह्यामया निंतिं युनेस काबुलं कासाया ख्वीगूगु मिनेटय् सान्त्वना गोल याःगु खः ।

अथेहे मेगु कासाय् न्यूकासल युनाइटेडं फुलह्यामयात प्रतिस्पर्धात्मक कासाय् छगूया विरुद्ध निगू गोलं बुकूगु दु ।

More Stories Like this