भट्टराई व भारत

सुरेश मानन्धर

स्वला न्ह्यः झलनाथ खनाल प्रधानमन्त्री जूबलय् ला मनूतय्सं तप्यंक हे धाःगु खः - थ्वं छुं याना नये फइ मखु। थौं डा. बाबुराम भट्टराई प्रधानमन्त्री जूबलय् मनूतय्सं धयाच्वंगु दु - थ्वं छुं याइ ला? झलनाथ खनाल व डा. बाबुराम भट्टराई दथुइ दुगु फरक थुलि जक खः। खास मखु।
डा. भट्टराई प्रधानमन्त्री जुइसातकि मनूतय्सं विश्लेषण सुरु यायेधुंकल जुइ, वय्कःया न्ह्यःने छु छु चुनौती दइ धकाः। तर चुनौती मालेगु थ्व विश्लेषण बेकार खः। छाय्धाःसां थ्व इलय् डा. भट्टराईया न्ह्यःने छुं दुसा व चुनौती हे छगू जक खः, चुनौती बाहेक मेगु छुं हे मदु। वय्कःया कार्यकाल फुक्क हे अर्थय् छगू चुनौती खः। पार्टी दुने अध्यक्ष प्रचण्डया चुनौती। सरकार दुने मधेसवादीया चुनौती। संसद दुने कांग्रेस व एमालेया चुनौती। थ्व चौतर्फी चुनौतीया दथुइ वय्कःया लागिं शान्ति व संविधान जक मखु स्वयम् सरकार तकं छगू चुनौती जुइगु खँय् शंका मदु। गुम्ह प्रधानमन्त्रीया लागिं सरकार तकं चुनौती खः, अज्याःम्हेसिया चुनौती छु छु खः थें धकाः मालेगु बेकार सिबे मेगु छु जुइ फइ? तर धाइ, डा. बाबुराम भट्टराई चुनौतीयात अवसरया रुपय् काइम्ह नेता खः। थ्व सम्पूर्ण चुनौतीयात वय्कलं अवसर धकाः काल यात धाःसा छुं जुइ नं फइ जुइ, मखुत धाःसा वय्कः नं सिंहदरवारय् फोटो छपाः झुण्डे यायेगु बाहेक मेगु छंु याये फइ मखु ।

थः प्रधानमन्त्री जुयागु थ्व घडी थःगु लागिं अवसर खः लाकि मखु, व वय्कलं भविष्यय् क्यना हे दी जुइ। तर वय्कःयात प्रधानमन्त्री दयेकादीम्ह पार्टी अध्यक्ष पुष्पकमल दाहाल (प्रचण्ड) या लागिं धाःसा थ्व छगू तःधंगु अवसर खः, उकी शंका मयाःसां जिउ। प्रचण्ड यदि धाथें हे चंखम्ह नेता खःसा वय्कलं डाक्टर सा'बयात प्रधानमन्त्री दयेकाः पार्टी दुने तःधंगु हे लबः कायेगु अवसरया लुखा चायेके खनी। झीत आः तक नं बांलाक हे लुमंनि, अध्यक्ष प्रचण्डं तःक्वःमछि हे चाःचाःहीकाः डा. भट्टराईयात भारतपरस्त धकाः द्वपं बीगु याः। छक्वः निक्वः ला भट्टराईयात प्रधानमन्त्री दयेकि धकाः भारतं तप्यंक हे दवाव बिउगु खँ तकं प्रचण्डं पिने धयादीगु दु। आः डा. भट्टराई प्रधानमन्त्री जुयादीगु व वय्कःयात भारतपाखें सञ्चालित धकाः आरोपित मधेसी मोर्चां हे समर्थन याःगुलिं भट्टराई वास्तवय् भारत पक्षधर हे खः धकाः पुष्टि यायेगु छगू बांलाःगु अवसर प्रचण्डया ल्हातय् वयाच्वंगु दु। कम्युनिष्ट पार्टी दुने न्हापा न्हापा दुश्मनयात ब्वः बी माल कि दरवारं सञ्चालित धकाः द्वपं बीगु खः। आः दरवार मदयेधुंकाः भारतं सञ्चालित धकाः द्वपं बीगु न्हूगु चलन सुरु जूगु दु। डा. भट्टराईयात बियातःगु थज्याःगु हे 'भारतपरस्त' धाःगु द्वपंयात आः सालनाल सहित हे पुष्टि यायेत अध्यक्ष प्रचण्डं पालिंनिसेंया बः पिकाइगु खँय् शंका मयाःसां जिउ। छाय्धाःसां वय्कःयात नं ला महाधिवेशनय् हानं पार्टी अध्यक्ष पदय् चुनाव ल्वायेमाःगु दनि नि ! डा. बाबुराम भट्टराईयात मधेसवादीतय्सं समर्थन याःगु धइगु हे वय्कःयात भारतलिसे स्वानाः बीगु याना वयाच्वंगु द्वपं पुष्टि याइगु दकलय् क्वातुगु आधार खः। थ्व स्वयां न्ह्यः जूगु प्रधानमन्त्रीया चुनावय् अध्यक्ष प्रचण्डयात मधेसवादीतय्सं भोट मबिउ। बरु तटस्थ च्वना बिल। अबलय् मधेसवादीतय्सं मुठ्ठी खोले मयाःगु कारणं यानाः हे अध्यक्ष प्रचण्ड खुगू चरण तक चुनावय् पराजित जुइ माल। अबलय् प्रचण्डयात ज्यान वंसां भोट मबिउपिं मधेसवादीतय्सं थौं बाबुरामयात भोट बिउगुया कारण छु? यदि माओवादी कार्यकर्तातय्सं थुकिया च्वः ज्वनाः मामां वन धाःसा मेगु च्वः न्हूदिल्ली तक थ्यनाच्वंगु लुइकेफु। उगु च्वः ज्वनाः सालेत प्रचण्ड लिफः मतुलीगु नं स्वाभाविक खः ।

अझ जुइफु, डा. भट्टराईयात प्रधानमन्त्री दयेकाः व वापतया 'भुक्तानी' अध्यक्ष प्रचण्ड थम्हं हे भारतपाखें कायेत नं स्वयेफु । 'छिमिसं धाःम्ह मनूयात जिं प्रधानमन्त्री दयेका बी धुन, आः उकिया वापत जितः छु बीगु?' थज्याःगु बार्गेन प्रचण्डपाखें मवनी धाये मफु। खतुं डा. भट्टराईया स्वापू भारतलिसे द हे मदुगु जा मखु। दु। बरु वय्कलं थ्व स्वापूयात नं आः छगू अवसरकथं छ्यलेमाःगु खनेदु। भारत लिसे दुगु क्वातुगु स्वापूयात थःत हे 'भारतपरस्त' धइगु द्वपं बीकेत जक मखु देय्या प्रगति जुइगु ज्याय् नं प्रयोग यायेत वय्कः न्ह्यचिलेमाः। जःलाखःला देय् भारतलिसे बांलाःगु स्वापू दइगु गुगुं अपराध मखु। उगु स्वापूयात कुटनीतिक मर्यादा हाचांगायाः कुर्सी कायेगु ज्याय् जक प्रयोग यात धाःसा व बरु अपराध जुइ। भारतया ग्वाहालि मदयेक सेनाया जर्नेल छम्ह तक नं चीके मफइगु जुयाच्वन धइगु खँ ला प्रचण्डं थः प्रधानमन्त्री जूबलय् बांलाक हे सीकेधुंकल जुइ। उकिं भारतलिसे सन्तुलित स्वापू तयेमाःगु खँयात नकारे याये मछिं। यदि डा. भट्टराईं भारतं थःप्रति यानाच्वंगु पत्याःयात आधार दयेकाः वयालिसे सन्तुलित स्वापू कायम यात व उगु स्वापूयात संविधान व शान्ति स्थापना यायेगु ज्याय् प्रयोग याये फत धाःसा सुयात आपत्ति जुइ?

सरकारय् डा. भट्टराईया तःधंगु भर धइगु हे मधेसी मोर्चा खः। मधेसी मोर्चाया थ्व भर अबलय् तक जक दइ गबलय् तक भारतलिसे भट्टराईया स्वापू क्वातुयाच्वनी। भारतलिसे क्वातुगु स्वापू कायम यायेगुया अर्थ वयागु न्ह्यःने आत्मसमर्पण यायेगु मखु धइगु दसि यदि डा. भट्टराईनं क्यनादिल धाःसा उकिं नेपाली राजनीतिया तःगूमछि आयामया न्हूगु कुलां चायेका बी ।

More Stories Like this