तसकं थाकुगु लँ दु डा. भट्टराईया न्ह्यःने

अन्ततः न्हूम्ह प्रधानमन्त्रीया रुपय् डा. बाबुराम भट्टराई निर्वाचित जुयादीगु दु। म्हिगः सदनय् जूगु मतदानय् ३४० सभासद्तय् समर्थन कयाः वय्कः न्हूम्ह प्रधानमन्त्री नियुक्त जुयादीगु खः। वय्कः प्रधानमन्त्री जुयादीगुया नापनापं आः खुन्हु छुं जुइ ला धइगु आशा नं मनूतय्सं कया हःगु खनेदु। वय्कः प्रति सर्वसाधारण जनतां याःगु थ्व आशा सकारात्मक खः ।

तर डा. भट्टराई न्हूम्ह प्रधानमन्त्री नियुक्त जुयादीसां वय्कःया लँपु धाःसा वय्कः स्वयां न्ह्यःयापिं प्रधानमन्त्रीतय् स्वयां नं जटिल व कठिन दु, थुकियात वय्कलं अवश्य नं वाःचायेकादीगु दयेमाः। दकलय् न्हापां ला वय्कःयात निर्णायक शक्तिया रुपय् मधेसवादी दलतय्सं समर्थन यानाच्वंगु दु गुमिगु माग व सर्तया धलः असीमित दु। उमिसं घरिघरि हे पूवंके मफइगु सर्तत न्ह्यःने तयाः प्रधानमन्त्रीयात कायल याइगु सम्भावना यक्वं दु। मधेसवादी दलतय्त भारतीय शासकतय् ल्वाभः खः धकाः बीगु यानाच्वंगु द्वपं गुलि सत्य खः धइगु खँ उमिसं थ्व दौरानय् प्रमयात गुलि दुःख बी व उलि सते याइ धइगु खँपाखें नं पुष्टि याइ। मेखे संविधानसभाया चुनाव धुंकाः देशय् न्हापांखुसी नेकपा (एमाले) विपक्षी बेञ्चय् च्वं वयेत्यंगु दु। धायेत ला एमालें सरकारयात रचनात्मक सहयोग हे याये धाइ, तर एमालेया रचनात्मक सहयोग गज्याःगु जुइ धइगु खँ वयागु विगतं क्यंगु ला डा. भट्टराईनं नं स्वयादीगु हे दयेमाः। एमाले व कांग्रेस थेंज्याःगु निगू बल्लाःगु पार्टीया विपक्षी खेमा न्हूम्ह प्रमया लागिं अवश्य नं सहज जुइ मखु। थ्व अवस्थाय् नवनिर्वाचित प्रम डा. भट्टराईया यात्रा मेपिं प्रमतय् स्वयां दुरुह जुइगु खँय् विवाद मदु ।

More Stories Like this