खुला म्याद थपया प्रस्ताव
संविधानसभाया म्याद थपे यायेत न्हूगु हे तयारी
येँ (सन्ध्या टाइम्स)/एमालेया अध्यक्ष झलनाथ खनालया नेतृत्वय् दुगु निर्वतमान सरकारं संविधानसभाया म्याद स्वला जक थपे यायेगु धकाः यानातःगु प्रस्तावयात हीकाः एकीकृत माओवादीया उपाध्यक्ष डा. बाबुराम भट्टराईया न्हूगु सरकारं संविधानसभाया म्याद खुला थपे यायेत न्हूगु हे प्रस्ताव यंकीगु जूगु दु। निवर्तमान प्रधानमन्त्री खनालं एकीकृत माओवादीया असहमतिया बाबजुद नं संविधानसभाया म्याद स्वला जक थप यायेगु प्रस्ताव यंकादीगु खः ।
एकीकृत माओवादीया थौं सुथय् च्वंगु केन्द्रीय पदाधिकारीतय् बैठकं भट्टराईया अध्यक्षताय् सरकार गठन जुइवं हे सरकारया न्हापांगु ज्या कथं संविधानसभाया म्याद खुला थप यायेगु प्रस्ताव यंकेगु धकाः निर्णय यासें नव नियुक्त प्रधानमन्त्री डा. भट्टराईयात सुझाव बिउगु खः।
माओवादी अध्यक्ष प्रचण्ड निवासय् च्वंगु उगु पदाधिकारी बैठक लिपा सचिव सीपी गजुरेलं संचारकर्मीतलिसे खँल्हासें थौं हे संसदय् संविधानसभाया म्याद खुला थप यायेगु निंतिं प्रस्ताव यंकीगु जानकारी बियादिल। वय्कलं निर्वतमान सरकारपाखें तःगु प्रस्तावयात लित कयाः न्हूगु प्रस्ताव कथं खुलाया म्याद थप यायेगु प्रस्ताव यंकेगु खँ नं कनादिल ।
संविधानसभाया म्याद कंस १४ गते तक जक ल्यं दनिगु जुयाः थौं च्वनीगु व्यवस्थापिका संसदया बैठकय् हे संविधानसभाया म्याद थपया बारे सहलह जुइगु खँ धाःगु दु। संविधानसभाया म्याद थप यायेत आः अन्तरिम संविधानया झिक्वःगु संशोधन यायेत्यंगु दु। थुगुसी मधेसवादी दलतपाखें संविधानसभाया म्याद खुला थप यायेगु खँय् सहमति दुगु जूसां कांग्रेस अथवा एमालें समर्थन मयायेकं दुई तिहाई बहुमतं पारित याये मफइगु जुयाः माओवादीयात नापं वर्तमान सरकारयात धाःसा उलि अःपुइगु अवस्था मदु ।
संवैधानिक प्रावधान कथं संविधान संशोधन यायेगु नितिं दुई तिहाई बहुमत आवश्यकता दु। उकिं वर्तमान सरकार व माओवादीयात दकलय् न्हापांगु चुनौती हे संविधानसभाया म्याद खुला थपया नितिं कांग्रेस व एमालेयात माने यायेगु हे जुइ। तर विज्ञ सूत्रतय्सं धाःसा संविधानसभाया म्याद खुला थपे यायेगु खँय् छुं भचा विवाद जूसां अन्ततः म्याद धाःसा थपे जुइ धाःगु दु ।
