डा. बाबुराम निश्चित

येँ (सन्ध्या टाइम्स)/थौं सुथय् च्वंगु मधेसी मोर्चाया बैठकं अन्ततः थौं हे जुइगु प्रधानमन्त्री चुनावय् माओवादीया उम्मेदवार डा. बाबुराम भट्टराईयात मत बीगु निर्णय याःगु दु। मधेसी मोर्चाया थ्व निर्णयया नापनापं थौ जुइगु प्रम पदया निर्वाचनय् डा. बाबुराम भट्टराई निर्वाचित जुइगु नं निश्चित जूगु दु। थ्व निर्वाचन लिपा वय्कः नेपाःया ३५ औं प्रधानमन्त्री जुयादी ।

मधेशी मोर्चा व माओवादी सरकार गठनयात कयाः थौं हे छगू प्यंगू बुँदाया सहमति नं जूगु खः। सहमति लिपा मोर्चाया समर्थन माओवादीयात वनीगु निश्चित जूगु खः। थुकिया नापं माओवादीयात नेकपा (माले), राष्ट्रिय जनमोर्चा व मेगु चीधंगु दलतय्सं नं समर्थन याइगु जूगु दु।
तर डा. भट्टराई प्रम जूसां सरकारया महत्वपूर्ण मन्त्रालयत धाःसा मधेसी मोर्चायात बीमाःगु जूगु दु। २२ गू मन्त्रालय मध्ये गृह, उर्जा, सञ्चार, परराष्ट्र लगायत १२ गू मन्त्रालय मधेसी मोर्चां इनाः काइसा मेगु निगू मन्त्रालय चीधंगु दलतय्सं काइ। माओवादीयात म्हो जक मन्त्रालय दइ ।

माओवादी-मधेसी मोर्चा सहमति
सरकार गठन यायेगु ताः तयाः थौं न्हिनय् तिनि माओवादी मधेसी मोर्चाया दथुइ ४ बुँदाया छगू सहमति जूगु दु। उकिया मुख्य सहमतित थथे दु:
१) सेना समायोजनया ज्या क्वचायेकेगु। माओवादीया ७,००० लडाकुयात समायोजन यायेगु। थ्व सम्बन्धी फुक्कं ज्या विशेष समिति मार्फत यायेगु ।
२) माओवादी युद्धकाल, मधेसी आन्दोलन, थरुहट आन्दोलन, जनजाति आन्दोलनय् राज्यपाखें पीडित जूपिंत राहत बीगु। मुद्दा खारेज यायेगु ।
३) राज्य पुनर्संरचना आयोग गठन मयायेगु ।
४) मधेसीयात सेनाय् प्रवेश सुरु याकेगु। वयेधुंकूगु बजेट परिमार्जन यायेगु। राष्ट्रिय पोशाक सम्बन्धी निर्णय हीकेगु ।