हानं छम्ह निरर्थक प्रधानमन्त्री ल्ययेगु ज्या

देशय् हानं मेम्ह बहुमतीय प्रधानमन्त्री ल्ययेगु निंतिं थौं चुनाव जुइत्यंगु दु। बहुमतीय प्रणालीपाखें स्वम्ह स्वम्ह प्रधानमन्त्री वलं नं छुं याये मफुगु दसु न्ह्यःने दयेक दयेकं राजनीतिक पार्टीतय्सं हानं छक्वः बहुमतीय प्रधानमन्त्री हे ल्ययेगु ज्या यानाच्वंगु दु। थुकी माओवादीपाखें डा. बाबुराम भट्टराई व कांग्रेसपाखें रामचन्द्र पौडेलं उम्मेदवारी बियाच्वंगु दु। तर वय्कःपिं मध्ये न्ह्याम्ह हे त्याःसां परिस्थिति धाःसा थ्व स्वयां न्ह्याःयापिं प्रधानमन्त्रीतय् स्वयां खास हे फरक मजुइगु निश्चित दु। देशया अवस्था थौं थ्व स्थितिइ लानाच्वंगु दु कि आः फुक्कं पार्टी जानाः मंकाः कथं ज्या मयायेकं छुं हे जुइ मखु। उकिं थ्व निम्ह मध्ये न्ह्याम्ह हे त्याःसां नं प्रधानमन्त्रीया कुर्सीइ च्वनेधुंकाः वयात मेगु पार्टीं ज्या याके मबीगु, दुःख बीगु सुरु याइगु निश्चित दु। बहुमतीय प्रधानमन्त्री जुइ सातकि वयात कुर्सीं क्वकायेगु लागिं अनेक खेल सुरु जुइगु व उकिं यानाः शान्ति व संविधानया ज्या ध्याकुनय् लाः वनीगु नं निश्चित खः। उकिं थौं चुनाव मार्फत बहुमतीय प्रधानमन्त्री ल्ययेगु धइगु हानं छक्वः संविधानसभाया महत्वपूर्ण ई सितिकं छ्वयेगु व देशय् हानं नं कलहया वातावरण ब्वलंका तयेगु खः। आः नं बहुमतीय प्रधानमन्त्री वयेगु धइगु भूपू जुइधुंकाः सिंहदरवारय् थःगु नं छपाः किपा यखायेगु स्वयां अप्वः छुं नं जुइ फइ मखु। थ्व खँयात सामान्य जनतां तकं बांलाक थू। मथूसा वहे प्रधानमन्त्री जुइत हथाय् चायाच्वंपिं नेतातय्सं जक मथूगु खः। बहुमतीय प्रणालीं न्ह्याम्ह हे प्रधानमन्त्री वःसां उकी नेपाली जनता व स्वयम् प्रधानमन्त्री जुइम्हेस्या पार्टी तकं लय्तायेगु थाय् मदु ।

More Stories Like this