'गथांमुगः'लिसे सुनिताया मतिना

सुनिता श्रेष्ठयात 'गथांमुगः'लिसे मतिना जूगु दु । छुं इलंनिसें सं.रा. अमेरिकाया भर्जिनिया स्टेटय् च्वना वयाच्वंम्ह सुनिता थ्व हे मतिनाया कारणं वुधवाः नेपाः लिहां वंगु दु ।

'गथांमुगः' सुनिताया छगू ड्रिम प्रोजेक्ट खः । नेवाः संस्कृतियात म्वाकेगु व न्ह्यब्वयेगु छगू कुतः, छगू संकिपा मार्फत । आः छुं ई लिपा हे झीसं सुनिताया न्हूगु संकिपा गथांमुगः स्वये खनीतिनि । 'नेपाः वनाः निन्हु स्वन्हुया दुने हे दक्वं ज्या न्ह्याके अले आः वइगु गथांमुगः चःह्रे स्वयां न्ह्यः हे थ्व संकिपा रिलिज याये' नेपाः लिहां वने न्ह्यः उत्साहित भावं नेपालमण्डलयात वं थःगु खँ कन ।

थुगु 'गथांमुगः' संकिपा ब्रेन पावर प्रा लिया ब्यानरय् तयार जुइत्यंगु खः । थुकिइ आर्यम नकःमि नं मेम्ह निर्देशक कथं खनेदइ, थुगु संकिपाया च्वमि नं आर्यम हे खः । करिव १०० मिनेटति ताःहाकइगु थुगु संकिपा संस्कृतिइ आधारित छगू हरर संकिपा जुइसा थुकिइ कम्प्यूटर एनिमेशन नं गाक्कं प्रयोग जुइ । नेवाः संस्कृतियात कयाः दयेकीगु थुगु फिल्म खँय् भासं तयार जुइत्यंगु दु ।

नेपाः च्वनेगु ई जःछि सुनितां थ्व संकिपा बाहेक नं 'धाःसा पत्याः मजू' नांया मेगु संकिपा नं सिधयेके त्यंगु दु । थुगु संकिपाय् सुनिता मू भूमिकाय् अभिनय याःगु दुसा थुकिया सहायक निर्देशक नं खः व । लिसें बाह्रा संस्कार यात कयाः दयेकातःगु संकिपा 'ट्वेल्भ डेज ' नांया थःगु मेगु संकिपा सहित आदिवासी चलचित्र महोत्सवय् सहभागी जुइत्यंगु दु ।

अले गुलि ईया दुने थ्व सकतां ज्या सिधइ?, लिसलय् सुनितां कन 'नेपालय् स्वला च्वनेगु जिगु योजना दु, ई म्हो जक दु सिधयेके माःगु ज्या यक्व दु । लिहां वयाः अमेरिकाया नेवाः मस्तय्गु क्लास हानं न्ह्याकेमानि ।' सुनितां भर्जिनियाय् नेवाः मस्तय्त नेवाः भाय्, नेवाः म्ये, प्याखं स्यनेगु ज्या नं यानाच्वंगु दु ।

More Stories Like this