माओवादी प्रस्तावय् अझं शंका

लडाकु समायोजनया प्रस्ताव कांग्रेसयात अमान्य

येँ (सन्ध्या टाइम्स)/शान्ति प्रक्रिया, संविधान निर्माण व सरकारबारे माओवादीं म्हिगः सार्वजनिक याःगु प्रस्तावयात नेपाली कांग्रेसया सभापति सुशील कोइरालां अन्तर्राष्ट्रिय जगतयात हाकनं झंगः लायेगु कुतः जक खः धयादीगु दु। थौं सुथय् रिपोर्टर्स क्लबं कोइराला निवासय् याःगु साक्षात्कारय् न्ववासें वय्कलं धयादिल, 'व अन्तर्राष्ट्रिय जगतयात हाकनं छकः झंगः लायेगु ज्या जक खः।' कोइरालां शान्ति प्रक्रिया कार्यान्वयन व माओवादी लडाकु व ल्वाभःया खँ क्वचायेके कथं उगु प्रस्तावं छुं नं आभास मबिउगु दावी नं यानादिल। वय्कलं धयादिल, 'छु छु न हः थें च्वंकल, आशा नं दुगु खः तर छुं हे मदु। केवल अन्तर्राष्ट्रिय जगतया दृष्टियात भ्रमय् लाकेगु ज्या खः। माओवादी लडाकु व ल्वाभःया खँ क्वचायेकी धकाः पत्याः यायेगु आधार मदु, जनता व राजनीतिक दलयात भुलभुले यायेगु ज्या जक माओवादीं याःगु दु ।'

ल्वाभः व लडाकुविहिन मजूतले माओवादी नेतृत्वया सरकार स्वीकार याये फइगु अवस्था मदु, शान्ति, संविधान व विकासया नितिं कांग्रेस नेतृत्वया सरकार दयेकेमाः धकाः नं कोइरालां दावी यानादिल। गिरिजाप्रसाद कोइरालां स्वद्वः तक लडाकु समायोजन याये फइ धाःगु व थःपिंसं प्यद्वः तक याये फइ धया वयाच्वनागु खँ कँसें कोइरालां उकियात भचा च्वय् क्वय् यायेफइगु संकेत बिसें पुनर्स्थापनाय् वनीपिं लडाकुतय्त ८/१० लाख तका बीगु खँ धाःसा माने याये फइ मखु धयादिल ।

भट्टराई व पौडेलया उम्मेदवारी दर्ता
कंस आइतवाः संसदय् प्रधानमन्त्री ल्ययेत जुइगु चुनावय् एकीकृत माओवादीपाखें डा. बाबुराम भट्टराई व नेपाली कांग्रेसपाखें रामचन्द्र पौडेलं थौं उम्मेदवारी दर्ता याःगु दु। माओवादी उपाध्यक्ष भट्टराईनं थौं सुथय् ११:१५ बजे संसद सचिवालय सिंहदरवारय् उम्मेदवारी दर्ता यानादीगु खः। अथे हे कांग्रेस उपसभापति रामचन्द्र पौडेलं १२ बजे थःगु उम्मेदवारी दर्ता यानादीगु खः। भट्टराईयात प्रस्तावक पार्टी अध्यक्ष प्रचण्ड व समर्थक नारायणकाजी श्रेष्ठ च्वनादीगु दु। अथे हे पौडेलया प्रस्तावक प्रकाशमान सिंह व समर्थक बिमलेन्द्र निधि जुयादीगु दु। आइतवाः प्रधानमन्त्रीया निंतिं चुनाव यायेत थौं हे उम्मेदवारतय्गु अन्तिम नांधलः पिकाइगु जूगु दु ।