आः एमालेया भोट चाहिं गुखे ले?

येँ (सन्ध्या टाइम्स)/आः जुइगु प्रधानमन्त्री निर्वाचनय् माओवादी व कांग्रेसया उम्मेदवारतय्सं नां दर्ता यायेधुंकूगु दु। उकी मध्ये संसदया स्वंगूगु तःधंगु दल एमालें सुयात समर्थन याइ थें? आः राजनीतिक ख्यःया ध्यान थुखेपाखे वंगु दु ।

यदि सहमतीय सरकार गठन यायेगु खःसा उकी एमाले बाधक मजुइगु निर्णय याःगु खः। तर बहुमतीय सरकार गठन यात धाःसा सुयात समर्थन यायेगु धकाः एमालें अझं खुलस्त मयाःनि। सर्वोच्चया निर्देशन कथं आः जुइगु चुनावय् तटस्थ नं च्वने दइ मखु। उकिं एमालें निम्ह मध्ये छम्हेसित थःगु मत मतसें मगाः। थुकिया बारे निर्णय यायेत थौं च्वनी धाःगु स्थायी समितिया बैठक नं स्थगित जूवंगु दु ।

मत सुयात बीगु धइगु खँय् एमालें आः तक छुं निर्णय मयाःनिसां एमालेया वरिष्ठ नेता माधव नेपालं धाःसा थौं सुथंनिसें मधेसवादी दलया नेतातय्त फोन यानाः माओवादी उम्मेदवार डा. बाबुराम भट्टराईयात समर्थन याये मते धकाः लबिङ्ग सुरु याःगु खँ सूत्रं धाःगु दु। मधेसवादी दलतय्त वय्कलं भोट बीगु हे खःसा कांग्रेस उम्मेदवार रामचन्द्र पौडेलयात बिउ धकाः 'सुझाव' बिउगु खँ नं सूत्रं धाःगु दु। वय्कलं आःतक मधेसी मोर्चाया नेतात विजयकुमार गच्छदार, ह्दयेष त्रिपाठी नापं मेमेपिंत नं अथे फोन यानाः भट्टराई विरुद्ध क्याम्पिङ सुरु याःगु खः। नेपालं अथे फोन याना हःगुलिं गुलिखे मधेसी नेतातय्सं एमालेया हे हानं मेपिं नेतातय्त फोन यानाः माधवया धापू थुइकेत स्वयाच्वंगु खँ सूत्रं धाःगु दु। माधवया फोनं मधेसी नेतात अलमल जुयाच्वंगु सीदुगु दु ।