थौं सिठ्ठी पुयाः नेवाःतय् मसाल जुलुस
येँ (सन्ध्या टाइम्स)/नेवाः स्वायत्त राज्य सुनिश्चित यायेमाःगु माग यासें नेवाः स्वायत्त राज्य मंकाः संघर्ष समितिं थौं बहनी ६ बजे शान्तिबाटीका रत्नपार्कं सिठ्ठी पुयाः मसाल जुलुस पिकाइगु जूगु दु। उगु जुलुस येँया थीथी लागा चाःहिलाः क्वचायेकीगु ग्वसाः दु। ज्याझ्वः तःजिक यायेगु लागिं व उकी आपालं मनूतय् सहभागी यायेत थौं सुथंनिसें ज्याझ्वः बारे माइकिङ्ग नं यानाच्वंगु दु ।
अथे हे कन्हय् यलय् सिठ्ठी पुयाः मसाल जुलुस पिकाइगु ज्याझ्वः दु। सनिलय् यल ध्वाखांनिसें उगु जुलुस पिहां वइगु ज्याझ्वः दु। न्हूगु संविधानय् नेवाः स्वायत्त राज्य सुनिश्चत यायेत माग यासें कंस मध्यपुर थिमिइ व भाद्र १३ गते किपुली नं मसाल जुलुस पिकाइगु ज्याझ्वः दु। पहिचान व सामर्थ्यया आधारय् राज्य पुनर्संरचना यायेमाःगु, नेवाः राज्य सुनिश्चित यायेमाःगु माग नेवाःतय्सं याना वयाच्वंगु दु ।
राजधानी प्रदेश वा संघीयता बिनाया संविधानयात अस्वीकार यायेगु घोषणा यासें संविधानसभायात दबाव बीगु नितिं नेवाःतय्सं अथे संघर्षया ज्याझ्वः पित बिउगु खः ।
