अन्नाया अनसनं थना हःपिं भारतीयत
भ्रष्टाचारं आक्रान्त भारतयात भ्रष्टाचारमुक्त यायेत आह्वान यासें आमरण अनसन च्वनाच्वंम्ह समाज सुधारक अन्ना हजारें न्ह्याकूगु आन्दोलनया लिच्वः नेपालय् नं लाःगु दु ।
भारतया थीथी प्रान्तय् च्वंपिं जनतां अन्नाया समर्थनय् र्याली व धर्ना ज्याझ्वः यानाच्वं थें नेपालय् च्वनाच्वंपिं भारतीय नागरिकतय्सं नं म्हिगः येँय् छगू र्याली पिकासें अन्नाया अनसनयात समर्थन व्यक्त यात। नागरिक न्ह्याथाय् च्वनाच्वंपिं जूसां थःगु देशया प्रगति जूगु स्वयेगु इच्छा न्ह्याम्हेस्यां दइगु जुयाच्वन। म्हिगः येँय् र्याली पिकाःपिं भारतीय नागरिकतय्सं थ्वहे अभिव्यक्ति ब्वःगु खः ।
भारतीय राजनीतिक नेता व थीथी ख्यःया मनूतय्सं यानाच्वंगु भ्रष्टाचारपाखें अनया जनता गुलि आक्रान्त जुइधुंकल धइगु खँ अन्नाया समर्थनय् प्रान्त-प्रान्तं पिहां वयाच्वंगु र्याली व धर्नां प्रस्ट यानाच्वंगु दु। थन तक कि विश्वया न्ह्यःने भारतया शान ब्वयेगु धकाः आयोजना याःगु राष्ट्रमण्डल ओलम्पिक कासाय् तकं व्यापक भ्रष्टाचार जूगु काण्ड सार्वजनिक जुइवं समस्त भारतवासीया छ्यं लज्जां क्वछुत। उकिं नं उमिसं अन्नाया अनसनयात समर्थन याःगु खः। थ्व आन्दोलनया झ्वलय् अन्नां संसदं पारित यायेगु लागिं लोकपाल विधेयक न्ह्यःने हयातःगु दु। उकी क्वय्या कर्मचारी जक मखु च्वय् प्रधानमन्त्रीयात तकं भ्रष्टाचारया दायराय् हयाः छानबिन यायेमाः धकाः च्वयातःगु छगू बुँदाय् विवाद जुयाच्वंगु दु। बहालवाला प्रधानमन्त्रीयात भ्रष्टाचारया द्वपनय् छानबिन याये जिउ वा मजिउ धइगु खँय् अन तःधंगु हे वहस जुयाच्वंगु दु। वहसं अन्नाया आन्दोलनयात निगूगु स्वतन्त्रता क्रान्तिया रुप बिबिउँ वनाच्वंगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
