धर्मोदय सभा: सहमति दयेकाः वने माल

हेरारत्न शाक्य

नेपाःया थकालि बौद्ध संस्था धर्मोदय सभा ६८ दँय् क्यंगु लसताय् भिंतुना ।

धर्मोदय सभा ६८ दँ न्ह्यः नेपालय् श्री ३ महाराज जुद्ध शम्शेर प्रधानमन्त्री जुयाच्वंबलय् च्याम्ह भिक्षुपिंत देशं पितिना छ्वयाः स्वला लिपा भारतया सारनाथय् श्रद्धेय बर्मी भन्ते उ. चन्द्रमणि महास्थवीरजु संस्थापक नायः जुयाः स्वनाबिज्याःगु खः। थ्व संस्थां नेपाःया बौद्ध समुदाययात स्वतन्त्रता बीकेत तिबः बिउगु सिकसिनं सिउ। लिपा आचार्य भिक्षु अमृतानन्द महास्थवीर भन्ते नं तःदँ तक नायः जुयाः नेतृत्व कयाः न्ह्याकाबिज्याःगु नं सकसिनं सिउ ।

लिपा विधान संशोधन जुयाः नेपाःया स्वंगू यानया गुरु आचार्यपिनिगु समुदायपाखें पालंपाः नायः जुइगु व्यवस्था जुल। थुगुसी धर्मोदय सभाय् नायः जुइगु पाः स्थवीरवादी भन्तेपिनिगु खः। धर्मोदय सभाया नायः चुनाव ल्वायेम्वाः, मनोनित जुइगु खः। थुगुसी धर्मोदय सभाया ६८ क्वःगु दँमुँज्या व न्हूगु ज्यासना पुचः ल्यज्या २०६८ भाद्रया ३ व ४ गते जुइगु सुचं लत्या न्ह्यः हे पिकाःगु खः। वंगु श्रावण ३० गते उम्मेदवारया नां दुतिनी कुन्हु मूछ्यांज्ये व दांभरि नापं दुजः पदय् यानाः स्वम्ह भन्तेपिनिगु नां दुतिन। यक्व दँ तक गृहस्थपिंसं जक चले याना वयाच्वंगु धर्मोदय सभाय् भिक्षुपिंसं 'की पोष्ट' हे ताके यानाः उम्मेदवारी दुत बिउबलय् खुब चर्चा जुल। अझ श्रावण ३१ गते उम्मेदवार भन्तेपिंसं विज्ञापन बियाः भोट फ्वन। सकभनं न्यन। श्रावण ३२ गते 'सन्ध्या टाइम्स' य् अजय साय्मिजुं भिक्षुपिं प्रशासकीय पदय् च्वने मजिउ धयागु बिचाः न्ह्यब्वयादिल। अथे हे भाद्र २ गते उगु हे पतिइ प्रणव तुलाधरया बिचाः भिक्षुपिं न्ह्यज्यानाः फुक्क क्षेत्रय् बुद्ध शासन न्ह्याकेमाः धयागु बिचाः न्ह्यब्वयादिल। थुगुसीया धर्मोदय सभाया दँमुँज्या देय्न्यंकं बौद्ध जगतय् न्हूगु चर्चाया बिषय जुल। गृहस्थ बौद्ध धर्मोदय सभासदतय्त भुखाय् ब्वल। गुलिसिनं जाभू हे लाकाः नइन ला धयाथें मतिइ तःगु थें नं ताल। थुगुसी नायः जुइगु भन्तेपिनिगु पाः, अझ मू छ्यांज्ये व दांभरि पदय् नं भन्तेपिंसं उम्मेदवारी बियाः त्याकाः धर्मोदय सभा भन्तेपिंसं प्वःचिनाः विधान हे हिली ला धकाः धन्दा काःगु थें नं खने दत। धर्मोदय सभाय् प्रवजित भिक्षुपिं, अनागारिका गुरुमांपिं दुजः जुइ जिउ। उकिं उम्मेदवारी जू वयेगु लँपु नं चाला हे च्वंगु जुल। पदाधिकारी जुइ चाहे जूपिं भन्तेपिं व हे लं वःगु खः मेकथं मखु। उकिं थुकी अन्यथा कायेम्वाः थें जितः ताः। बज्रयानीपिंत छखे लाकी ला धयागु शंका काये नं म्वाः थें च्वं। धर्मोदय सभा थेंज्याःगु विशुद्ध बौद्ध संस्था प्रवजित भिक्षुपिं, अनागारिका गुरुमांपिं, गुरुजुपिं, गृहस्थ उपासक उपासिकापिनिगु मंकाः संस्था खः। अन सकसितं उति खंकेमाः। पदाधिकारीपिं चा हे भन्ते, गुरुमां वा गृहस्थ बौद्ध जू वल धाःसा संस्थायात छुं पाइ मखु। अन धर्मया ज्या यायेगु खः। धर्मोदय सभाया विधान कथं लक्ष्य व उद्देश्य पूवंकेगु मू ज्या खः। थ्व ज्या प्रवजितपिंसं याये मजिउ धकाः धयातःगु दइ मखु। उकिं तटस्थ बिनय, कानून विज्ञपिं तयाः खँ ल्हानाः सहमतिइ वनाः ज्या याये माल ।

थौंया अन्तर्राष्ट्रिय बौद्ध जगतय् नेपाःया राष्ट्रिय बौद्ध जगतं छप्पँ जुयाः क्यने माःगु दु। नेपालय् आः दयेकाच्वंगु न्हूगु संविधानय् धर्म निरपेक्ष कायम यायेत सकलें बौद्धत छप्पँ जुयाः दवाव बीमाःगु दु। नेपाःया सीमा दुने पूर्व मेचींनिसें पश्चिम महाकाली, उत्तर हिमाल क्वंनिसें दक्षिण तराई, मधेश तकया नेपाःमि बौद्ध छप्पँ छधी जुइ फयेकेत धर्मोदय सभां तःधंगु कुतः यायेमाःगु दु। भिक्षु, लामा गुरु, गुरुजु, आनी, गुरुमां, गृहस्थ उपासक उपासिका सकलें छप्पँ जुइमाः। 'जिपिं, जिमिगु' मधायेगु हे वेश जुइ। ल्यज्याय् त्यानाः वंपिंसं नं मवंपिंसं नं संस्थाय् मंकाःगु भावना तयेमाः। सकसितं उति खंके हे माः। कथंकदाचित त्याना वंपिंसं छगू जक यानयात कःघानाः व्यवहार यात धाःसा विधान कथं कारबाही साधारण सभां या हे याइ। आः हे ज्या मयाइ, अप्वः याइ, ल्वः, मल्वः धयाच्वनेमाः थें मच्वं। मखुगु, मजिउगु, मत्यःगु, विधान अःखः सुना नं ज्या यात धाःसा दण्ड बीत साधारण सभां न्यायिक समिति दयेकेफु। आवंनिसें शंकाया दृष्टिं स्वयेगु पाय्छि जुइ मखु। धर्मोदय याकःचिगु वा छपुचःचिगु हुकुमी शासन चले जुइ नं मखु। धर्मोदय सभाया परिपक्व प्रबुद्धपिं मू दुजःत छाय् ग्याःगु खः, अजू चाः ।

(च्वमि युवक बौद्ध मण्डलया पुलांम्ह नायः खः।)

More Stories Like this